kyon na jahan mein ho ayan aib-o-hunar alag-alag

kyoñ na jahāñ meñ ho ayaañ aib-o-hunar alag-alag

dekhte haiñ ba-chashm-e-ġhaur ahl-e-nazar alag-alag

raah meñ un ko vahm thā koī na bad-gumān ho

aa.e to sāth-sāth vo mujh se magar alag-alag

kis kā yaqīn kījiye kis kā yaqīñ na kījiye

laa.e haiñ us kī bazm se yaar ḳhabar alag-alag

maiñ huuñ idhar to vo udhar maiñ huuñ yahāñ to vo vahāñ

rahte haiñ mujh se duur duur āTh-pahar alag-alag

ranj-e-firāq-e-yār bhī sadma-e-rozgār bhī

ek dil aur itne ġham chāhiye ghar alag-alag

un ko ye vahm hai kahīñ ek se ek mil na jaa.eñ

log bahut haiñ bazm meñ sab haiñ magar alag-alag

hashr ko us ne chun liye 'dāġh' gunāhgār-e-ishq

taaḌ ga.ī hazār meñ us kī nazar alag-alag

kyon na jahan mein ho ayan aib-o-hunar alag-alag

dekhte hain ba-chashm-e-ghaur ahl-e-nazar alag-alag

rah mein un ko wahm tha koi na bad-guman ho

aae to sath-sath wo mujh se magar alag-alag

kis ka yaqin kijiye kis ka yaqin na kijiye

lae hain us ki bazm se yar KHabar alag-alag

main hun idhar to wo udhar main hun yahan to wo wahan

rahte hain mujh se dur dur aaTh-pahar alag-alag

ranj-e-firaq-e-yar bhi sadma-e-rozgar bhi

ek dil aur itne gham chahiye ghar alag-alag

un ko ye wahm hai kahin ek se ek mil na jaen

log bahut hain bazm mein sab hain magar alag-alag

hashr ko us ne chun liye 'dagh' gunahgar-e-ishq

taD gai hazar mein us ki nazar alag-alag