kyon na taDpa de jahan ko soKHta-jaanon ki baat

kyoñ na taḌpā de jahāñ ko soḳhta-jānoñ kī baat

muztarib kartī hai insānoñ ko insānoñ kī baat

dil-shikasta hausle hairāñ nigāh-e-ārzū

zindagī ko raas kab aa.ī sanam-ḳhānoñ kī baat

tīrgī-e-gesū-e-hastī kā aalam kyā kaheñ

dil hī dil meñ ghuT ke rah jaatī hai armānoñ kī baat

aam hotā jā rahā hai qissa-e-jām-o-subū

khul rahī hai ahl-e-dil par aaj paimānoñ kī baat

ab nikharte jā rahe haiñ āriz-e-husn-e-hayāt

ho rahī hai surḳh-rū ḳhūñ-gashta armānoñ kī baat

tishnagī lau de rahī hai ārzū-e-zīst ko

Dhal rahī hai aag ke sho.aloñ meñ paimānoñ kī baat

tīrgī-e-dahr meñ aish-o-tarab kī dāstāñ

'faiz' vīrāne meñ ho jaise gulistānoñ kī baat

kyon na taDpa de jahan ko soKHta-jaanon ki baat

muztarib karti hai insanon ko insanon ki baat

dil-shikasta hausle hairan nigah-e-arzu

zindagi ko ras kab aai sanam-KHanon ki baat

tirgi-e-gesu-e-hasti ka aalam kya kahen

dil hi dil mein ghuT ke rah jati hai armanon ki baat

aam hota ja raha hai qissa-e-jam-o-subu

khul rahi hai ahl-e-dil par aaj paimanon ki baat

ab nikharte ja rahe hain aariz-e-husn-e-hayat

ho rahi hai surKH-ru KHun-gashta armanon ki baat

tishnagi lau de rahi hai aarzu-e-zist ko

Dhal rahi hai aag ke shoalon mein paimanon ki baat

tirgi-e-dahr mein aish-o-tarab ki dastan

'faiz' virane mein ho jaise gulistanon ki baat