kyon zamane ka hum gila na karen

kyoñ zamāne kā ham gila na kareñ

kuchh bhī ho koī iltijā na kareñ

hukm-e-hākim ajiib hai yaaro

sab sitam sah leñ aur gila na kareñ

sabr-o-taslīm to sarisht meñ hai

ġhair mumkin hai ham vafā na kareñ

kis tarah us ko bhuul sakte haiñ

apne maulā se kyā duā na kareñ

lutf-o-ehsāñ kī had o bast kahāñ

arz kyoñ harf-e-mudda.ā na kareñ

kāsa-e-dil ba-dast pur-ummīd

munqata.a rishta-e-vafā na kareñ

ḳhūn-e-nāhaq to rā.egāñ na gayā

kyoñ bhalā zikr-e-karbalā na kareñ

jurm-e-nā-karda kī sazā 'sādiq'

paa.eñ ma.asūm ye ḳhatā na kareñ

kyon zamane ka hum gila na karen

kuchh bhi ho koi iltija na karen

hukm-e-hakim ajib hai yaro

sab sitam sah len aur gila na karen

sabr-o-taslim to sarisht mein hai

ghair mumkin hai hum wafa na karen

kis tarah us ko bhul sakte hain

apne maula se kya dua na karen

lutf-o-ehsan ki had o bast kahan

arz kyon harf-e-muddaa na karen

kasa-e-dil ba-dast pur-ummid

munqata rishta-e-wafa na karen

KHun-e-nahaq to raegan na gaya

kyon bhala zikr-e-karbala na karen

jurm-e-na-karda ki saza 'sadiq'

paen masum ye KHata na karen