kyun KHalwat-e-gham mein rahte ho kyun gosha-nashin bekar hue

kyuuñ ḳhalvat-e-ġham meñ rahte ho kyuuñ gosha-nashīñ bekār hue

āḳhir tumheñ sadma kyā pahuñchā kyā soch ke ḳhud-āzār hue

kyuuñ saaf kushāda rastoñ par tum Thokareñ khāte phirte ho

kyuuñ tīra-o-tār sī galiyoñ meñ tum aan ke ḳhush-raftār hue

kyuuñ rāsta chhoḌ ke chalte ho kyuuñ logoñ se katrāte ho

kyuuñ chalte phirte apne liye tum aap hī ik dīvār hue

kyā uThte baiThte sochte ho kyā likhte paḌhte rahte ho

is umr meñ ye be-kaifī kyuuñ kis vāste nek-atvār hue

kyuuñ aise safar par nikle ho manzil nahīñ jis kī koī bhī

kyuuñ raah pe aisī chalte ho saa.e bhī jahāñ dīvār hue

kyuuñ tark-e-alā.iq ko tum ne samjhā hai ilāj-e-ġham āḳhir

dekho to valī suufī bhī yahāñ kis ThaaT ke duniyā-dār hue

māyūsī-e-paiham se tum ne yārāna ye kaisā gāñThā hai

andoh-o-alam the jitne bhī āḳhir vo gale kā haar hue

is kalba-e-ahzāñ se hargiz ubhregā na sūraj koī bhī

kab ḳhaak sitāra-bār huī kab saa.e sahar-āsār hue

kab sub.h ke naale kaam aa.e kyā girya-e-nīm-shabī se milā

is qarya-e-ḳhvāb-e-faroshāñ meñ tum kis ke liye bedār hue

bekār ulajhte rahte ho kyuuñ ulTī sīdhī bātoñ meñ

ye marhale vasl-o-hijrañ ke ab aise bhī kyuuñ dushvār hue

us kūche kī raah to samjhāo jis kūche meñ jaanā mushkil hai

us shaḳhs kā naam to batlāo tum jis ke liye bīmār hue

mushfiq ne ye bāteñ sun ke kahā bāteñ na huiiñ ash.ār hue

ye dard baTāne vaale bhī kis shaan ke ḳhush-guftār hue

sad-shukr ki ḳhush-uslūbī se takmīl ko pahuñchī rusvā.ī

muhtāj-e-duā the jo ḳhud hī āḳhir vo mire ġham-ḳhvār hue

kyun KHalwat-e-gham mein rahte ho kyun gosha-nashin bekar hue

aaKHir tumhein sadma kya pahuncha kya soch ke KHud-azar hue

kyun saf kushada raston par tum Thokaren khate phirte ho

kyun tira-o-tar si galiyon mein tum aan ke KHush-raftar hue

kyun rasta chhoD ke chalte ho kyun logon se katraate ho

kyun chalte phirte apne liye tum aap hi ek diwar hue

kya uThte baiThte sochte ho kya likhte paDhte rahte ho

is umr mein ye be-kaifi kyun kis waste nek-atwar hue

kyun aise safar par nikle ho manzil nahin jis ki koi bhi

kyun rah pe aisi chalte ho sae bhi jahan diwar hue

kyun tark-e-alaiq ko tum ne samjha hai ilaj-e-gham aaKHir

dekho to wali sufi bhi yahan kis ThaT ke duniya-dar hue

mayusi-e-paiham se tum ne yarana ye kaisa ganTha hai

andoh-o-alam the jitne bhi aaKHir wo gale ka haar hue

is kalba-e-ahzan se hargiz ubhrega na suraj koi bhi

kab KHak sitara-bar hui kab sae sahar-asar hue

kab subh ke nale kaam aae kya girya-e-nim-shabi se mila

is qarya-e-KHwab-e-faroshan mein tum kis ke liye bedar hue

bekar ulajhte rahte ho kyun ulTi sidhi baaton mein

ye marhale wasl-o-hijran ke ab aise bhi kyun dushwar hue

us kuche ki rah to samjhao jis kuche mein jaana mushkil hai

us shaKHs ka nam to batlao tum jis ke liye bimar hue

mushfiq ne ye baaten sun ke kaha baaten na huin ashaar hue

ye dard baTane wale bhi kis shan ke KHush-guftar hue

sad-shukr ki KHush-uslubi se takmil ko pahunchi ruswai

muhtaj-e-dua the jo KHud hi aaKHir wo mere gham-KHwar hue