kyun KHarabaat mein laf-e-hama-dani waiz
kyun KHarabaat mein laf-e-hama-dani waiz
Munshi Amirullah Tasleem
MORE BYMunshi Amirullah Tasleem
kyuuñ ḳharābāt meñ lāf-e-hama-dānī vaa.iz
kaun suntā hai tirī harzā-bayānī vaa.iz
daftar-e-va.az ke nuqte bhī na hoñge itne
jitne haiñ dil meñ mire dāġh-e-nihānī vaa.iz
sach sahī jannat-o-dozaḳh kā fasāna lekin
kis tarah maan luuñ maiñ terī zabānī vaa.iz
be-vazū pā-e-ḳhum-e-bāda ko chhū letā hai
ḳhaak aatī hai tujhe martaba-dānī vaa.iz
narm bhī dil suḳhan-e-garm se ab tak na huā
dekh lī ham ne tirī sho.ala-bayānī vaa.iz
nek-o-bad ḳhuub samajhtā huuñ karūñ kyā ki abhī
sunñe detā nahīñ āshob-e-javānī vaa.iz
rindī-o-zohd riyā.ī meñ haiñ donoñ yaktā
misl merā hai na terā koī saanī vaa.iz
ye ḳharābāt hai jā ḳhair se apne ghar ko
muñh kī khulvā.e na phir tez-zabānī vaa.iz
aaj samjhā ga.ī kyā tujh ko ibādat terī
na rahā mashġhala-e-ashk-fishānī vaa.iz
is qadar hai jo dam-e-naza.a havas duniyā kī
saath le jā.egā kyā ālam-e-fānī vaa.iz
riñd huuñ de mujhe jām-e-mai-at.har kī ḳhabar
tujh ko kausar kā mubārak rahe paanī vaa.iz
zard ho jaatā hai sun kar ruḳh-e-gulgūñ merā
tirī taqrīr hai yā bād-e-ḳhizānī vaa.iz
naqsha firdaus kā bātoñ meñ dikhā detā hai
ye zabāñ hai tirī yā ḳhāma-e-mānī vaa.iz
chalte phirte nahīñ be-vaj.h ye ronā merā
saath phirtā huuñ liye ġham kī nishānī vaa.iz
kyā ruke ḳhāma-e-'taslīm' dam-e-fikr-e-suḳhan
tab.a meñ aaj hai dariyā kī ravānī vaa.iz
kyun KHarabaat mein laf-e-hama-dani waiz
kaun sunta hai teri harza-bayani waiz
daftar-e-waz ke nuqte bhi na honge itne
jitne hain dil mein mere dagh-e-nihani waiz
sach sahi jannat-o-dozaKH ka fasana lekin
kis tarah man lun main teri zabani waiz
be-wazu pa-e-KHum-e-baada ko chhu leta hai
KHak aati hai tujhe martaba-dani waiz
narm bhi dil suKHan-e-garm se ab tak na hua
dekh li hum ne teri shoala-bayani waiz
nek-o-bad KHub samajhta hun karun kya ki abhi
sunne deta nahin aashob-e-jawani waiz
rindi-o-zohd riyai mein hain donon yakta
misl mera hai na tera koi sani waiz
ye KHarabaat hai ja KHair se apne ghar ko
munh ki khulwae na phir tez-zabani waiz
aaj samjha gai kya tujh ko ibaadat teri
na raha mashghala-e-ashk-fishani waiz
is qadar hai jo dam-e-naza hawas duniya ki
sath le jaega kya aalam-e-fani waiz
rind hun de mujhe jam-e-mai-athar ki KHabar
tujh ko kausar ka mubarak rahe pani waiz
zard ho jata hai sun kar ruKH-e-gulgun mera
teri taqrir hai ya baad-e-KHizani waiz
naqsha firdaus ka baaton mein dikha deta hai
ye zaban hai teri ya KHama-e-mani waiz
chalte phirte nahin be-wajh ye rona mera
sath phirta hun liye gham ki nishani waiz
kya ruke KHama-e-'taslim' dam-e-fikr-e-suKHan
taba mein aaj hai dariya ki rawani waiz
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.