kyun masafat mein na aae yaad apna ghar mujhe

kyuuñ masāfat meñ na aa.e yaad apnā ghar mujhe

Thokareñ dene lage haiñ raah ke patthar mujhe

kis kā ye ehsās jaagā dopahar kī dhuup meñ

DhūñDne niklā hai nañge paañv nañge-sar mujhe

jis meñ āsūda rahā maiñ vo thā kāġhaz kā makāñ

ek hī jhoñkā havā kā kar gayā be-ghar mujhe

maiñ to in ālā.ishoñ se duur ik ā.īna thā

aa lagā hai merī apnī soch kā patthar mujhe

aa gayā thā maiñ sitam kī bastiyoñ ko rauñd kar

kyā ḳhabar thī ḳhud nigal jā.egā apnā ghar mujhe

ab anā kī chaar dīvārī ko girnā chāhiye

qaid kar rakkhā hai apnī zaat ke andar mujhe

'fauq' sailāb-e-ġham-e-daurāñ bahā kar le gayā

dekhtā hī rah gayā ik husn kā paikar mujhe

kyun masafat mein na aae yaad apna ghar mujhe

Thokaren dene lage hain rah ke patthar mujhe

kis ka ye ehsas jaga dopahar ki dhup mein

DhunDne nikla hai nange panw nange-sar mujhe

jis mein aasuda raha main wo tha kaghaz ka makan

ek hi jhonka hawa ka kar gaya be-ghar mujhe

main to in aalaishon se dur ek aaina tha

aa laga hai meri apni soch ka patthar mujhe

aa gaya tha main sitam ki bastiyon ko raund kar

kya KHabar thi KHud nigal jaega apna ghar mujhe

ab ana ki chaar diwari ko girna chahiye

qaid kar rakkha hai apni zat ke andar mujhe

'fauq' sailab-e-gham-e-dauran baha kar le gaya

dekhta hi rah gaya ek husn ka paikar mujhe