kyun na afsana-e-gham kaif ka unwan Thahre

kyuuñ na afsāna-e-ġham kaif kā unvāñ Thahre

shiddat-e-dard hī jab dard kā darmāñ Thahre

jis jagah ham sā koī chāk-e-garebāñ Thahre

shauq se aa ke vahāñ fasl-e-bahārāñ Thahre

us ke dāman kī taraf haath baḌhā.ūñ kaise

jis ke dāman kī mahak sho.alagī-e-jāñ Thahre

manzileñ aatī haiñ aur aa ke guzar jaatī haiñ

dekhiye jā ke kahāñ qāfila-e-jāñ Thahre

pichhle va.ade jo nahīñ yaad to kyā baat huī

phir koī ahd-e-vafā phir koī paimāñ Thahre

aap ko dekhūñ to ho duur mirī tishna-labī

aap aa jaa.eñ to jazbāt kā tūfāñ Thahre

shoḳhī-e-dast-e-sabā se to koī kuchh na kahe

mere sar tohmat-e-gesū-e-pareshāñ Thahre

kyun na afsana-e-gham kaif ka unwan Thahre

shiddat-e-dard hi jab dard ka darman Thahre

jis jagah hum sa koi chaak-e-gareban Thahre

shauq se aa ke wahan fasl-e-bahaaran Thahre

us ke daman ki taraf hath baDhaun kaise

jis ke daman ki mahak shoalagi-e-jaan Thahre

manzilen aati hain aur aa ke guzar jati hain

dekhiye ja ke kahan qafila-e-jaan Thahre

pichhle wade jo nahin yaad to kya baat hui

phir koi ahd-e-wafa phir koi paiman Thahre

aap ko dekhun to ho dur meri tishna-labi

aap aa jaen to jazbaat ka tufan Thahre

shoKHi-e-dast-e-saba se to koi kuchh na kahe

mere sar tohmat-e-gesu-e-pareshan Thahre