kyun na rah pae is jahan se pare

kyuuñ na rah paa.e is jahāñ se pare

aur bhī the jahāñ yahāñ se pare

ham jahāñ paas tere aa baiThe

tū uThā ho gayā vahāñ se pare

talḳhiyāñ aur baḌh ga.iiñ dil kī

jab huiiñ talḳhiyāñ zabāñ se pare

ye jo tū merī rah meñ haa.il hai

jaane kab hogā darmiyāñ se pare

maiñ to apne bhī ās-pās nahīñ

aur ho jā.ūñ maiñ kahāñ se pare

mujh pe saaya na Dāliye apnā

mujh ko rahnā hai sā.ebāñ se pare

ishq vo mār-e-āstīñ jis kā

zahr utrā hai jism-o-jāñ se pare

maar kar Daal de jo chhāñv meñ

ham bhale aise mehrbāñ se pare

yuuñ to vīrāñ hai āshiyāñ bhī magar

ḳhaak uḌā.eñge āshiyāñ se pare

ham jo kaasa uThā.e aa baiThe

ab karo ham ko āstāñ se pare

kyun na rah pae is jahan se pare

aur bhi the jahan yahan se pare

hum jahan pas tere aa baiThe

tu uTha ho gaya wahan se pare

talKHiyan aur baDh gain dil ki

jab huin talKHiyan zaban se pare

ye jo tu meri rah mein hail hai

jaane kab hoga darmiyan se pare

main to apne bhi aas-pas nahin

aur ho jaun main kahan se pare

mujh pe saya na Daliye apna

mujh ko rahna hai saeban se pare

ishq wo mar-e-astin jis ka

zahr utra hai jism-o-jaan se pare

mar kar Dal de jo chhanw mein

hum bhale aise mehrban se pare

yun to viran hai aashiyan bhi magar

KHak uDaenge aashiyan se pare

hum jo kasa uThae aa baiThe

ab karo hum ko aastan se pare