kyun pareshan ai dil-e-nakaam hai

kyuuñ pareshāñ ai dil-e-nākām hai

zindagī majbūriyoñ kā naam hai

kyā mohabbat kā yahī paiġhām hai

aañkh se dil tak sukūt-e-shām hai

tujh se āzurda dil-e-nākām hai

phir bhī terā hī laboñ par naam hai

bhāgte duniyā ke pīchhe kab talak

chhoḌ kar duniyā bahut ārām hai

ho chukīñ bad-nāmiyāñ barbādiyāñ

ab nigāh-e-nāz kyā paiġhām hai

aap aa.e aur aa kar chal diye

ruuh meñ ab tak vahī kohrām hai

jaag uThtā hai shu.ūr-e-zindagī

kaise kahiye ishq jins-e-ḳhām hai

kuchh mohabbat aur kuchh nafrat unheñ

is ta.alluq kā bhī koī naam hai

Dūbte dil meñ mire terā ḳhayāl

jhilmilātā sā charāġh-e-shām hai

ḳhud ḳharābī DhūñDhtī hai zindagī

aap par us kā ġhalat ilzām hai

in dinoñ chup chup se rahte ho 'shahāb'

kuchh kaho to kyā ḳhayāl-e-ḳhām hai

kyun pareshan ai dil-e-nakaam hai

zindagi majburiyon ka nam hai

kya mohabbat ka yahi paigham hai

aankh se dil tak sukut-e-sham hai

tujh se aazurda dil-e-nakaam hai

phir bhi tera hi labon par nam hai

bhagte duniya ke pichhe kab talak

chhoD kar duniya bahut aaram hai

ho chukin bad-namiyan barbaadiyan

ab nigah-e-naz kya paigham hai

aap aae aur aa kar chal diye

ruh mein ab tak wahi kohram hai

jag uThta hai shuur-e-zindagi

kaise kahiye ishq jins-e-KHam hai

kuchh mohabbat aur kuchh nafrat unhen

is talluq ka bhi koi nam hai

Dubte dil mein mere tera KHayal

jhilmilata sa charagh-e-sham hai

KHud KHarabi DhunDhti hai zindagi

aap par us ka ghalat ilzam hai

in dinon chup chup se rahte ho 'shahab'

kuchh kaho to kya KHayal-e-KHam hai