kyun tere sath rahin umr basar hone tak

kyuuñ tire saath rahīñ umr basar hone tak

ham na dekheñge imārat ko khañDar hone tak

tum to darvāza khulā dekh ke dar aa.e ho

tum ne dekhā nahīñ dīvār ko dar hone tak

chup rahīñ aah bhareñ chīḳh uTheñ yā mar jaa.eñ

kyā kareñ be-ḳhabaro tum ko ḳhabar hone tak

ham pe kar dhyān are chāñd ko takne vaale

chāñd ke paas to mohlat hai sahar hone tak

haal mat pochhiye kuchh bāteñ batāne kī nahīñ

bas duā kiije duāoñ meñ asar hone tak

sag-e-āvāra ke mānind mohabbat ke faqīr

dar-ba-dar hote rahe shahr-badar hone tak

aap maalī haiñ na sūraj haiñ na mausam phir bhī

biij ko dekhte rahiyegā samar hone tak

dasht-e-ḳhāmosh meñ dam sādhe paḌā rahtā hai

paañv kā pahlā nishāñ rāh-guzar hone tak

faanī hone se na ghabrā.iye 'fāris' ki hameñ

an-ginat martaba marnā hai amar hone tak

kyun tere sath rahin umr basar hone tak

hum na dekhenge imarat ko khanDar hone tak

tum to darwaza khula dekh ke dar aae ho

tum ne dekha nahin diwar ko dar hone tak

chup rahin aah bharen chiKH uThen ya mar jaen

kya karen be-KHabaro tum ko KHabar hone tak

hum pe kar dhyan are chand ko takne wale

chand ke pas to mohlat hai sahar hone tak

haal mat pochhiye kuchh baaten batane ki nahin

bas dua kije duaon mein asar hone tak

sag-e-awara ke manind mohabbat ke faqir

dar-ba-dar hote rahe shahr-badar hone tak

aap mali hain na suraj hain na mausam phir bhi

bij ko dekhte rahiyega samar hone tak

dasht-e-KHamosh mein dam sadhe paDa rahta hai

panw ka pahla nishan rah-guzar hone tak

fani hone se na ghabraiye 'faris' ki hamein

an-ginat martaba marna hai amar hone tak