kyun yaad ye sab qaht ke asbab na aae

kyuuñ yaad ye sab qaht ke asbāb na aa.e

jab ham ne duā kī thī ki sailāb na aa.e

ham ko to utarnā hai samundar kī tahoñ meñ

haath aa.e ki ab gauhar-e-nāyāb na aa.e

tadbīr ke mehvar pe rahā meñ yūñhī raqsāñ

ta.abīr ke markaz pe mire ḳhvāb na aa.e

bāhar jo uThe shor to khiḌkī se na jhāñko

āñkhoñ pe tumhārī kahīñ tezāb na aa.e

elaan kiyā uḌtī huī ḳhaak ne har samt

manzar pe koī ḳhitta-e-shādāb na aa.e

maiñ ne jo kahā tuḳhm-e-vafā haiñ mire aañsū

kahne lage miTTī meñ unheñ daab na aa.e

nikle haiñ sar-e-shām liye mash.al-e-fan ham

nazdīk koī kāġhzī mahtāb na aa.e

kyun yaad ye sab qaht ke asbab na aae

jab hum ne dua ki thi ki sailab na aae

hum ko to utarna hai samundar ki tahon mein

hath aae ki ab gauhar-e-nayab na aae

tadbir ke mehwar pe raha mein yunhi raqsan

tabir ke markaz pe mere KHwab na aae

bahar jo uThe shor to khiDki se na jhanko

aankhon pe tumhaari kahin tezab na aae

elan kiya uDti hui KHak ne har samt

manzar pe koi KHitta-e-shadab na aae

main ne jo kaha tuKHm-e-wafa hain mere aansu

kahne lage miTTi mein unhen dab na aae

nikle hain sar-e-sham liye mashal-e-fan hum

nazdik koi kaghzi mahtab na aae