lai meri junun ki manzil kidhar mujhe

laa.ī mirī junūn kī manzil kidhar mujhe

hairat se dekhte haiñ mire ham-safar mujhe

aayā huā kahīñ se koī ajnabī huuñ maiñ

dauḌe hai kaaT khāne ko merā hī ghar mujhe

yādash-ba-ḳhair ġham se subuk-dosh kar ga.ī

vo zindagī jo baar rahī 'umr bhar mujhe

vo jalva-gar jahān ke har juzv-o-kul meñ hai

ye aur baat hai ki na aa.e nazar mujhe

kyā jaane husn-o-'ishq haiñ kis marhale meñ ab

un ko mirī ḳhabar hai na un kī ḳhabar mujhe

maqtal meñ jā ghusūñ maiñ anal-‘ishq chīḳhtā

shānoñ pe ab to bojh sā lagtā hai sar mujhe

ab tak to merā kaam bhī puurā nahīñ huā

be-vaqt maar Dālegā marne kā Dar mujhe

thā koī ġham-gusār dam-e-marg ai 'nishāt'

rote rahe sukūn se dīvār-o-dar mujhe

lai meri junun ki manzil kidhar mujhe

hairat se dekhte hain mere ham-safar mujhe

aaya hua kahin se koi ajnabi hun main

dauDe hai kaT khane ko mera hi ghar mujhe

yaadash-ba-KHair gham se subuk-dosh kar gai

wo zindagi jo bar rahi 'umr bhar mujhe

wo jalwa-gar jahan ke har juzw-o-kul mein hai

ye aur baat hai ki na aae nazar mujhe

kya jaane husn-o-'ishq hain kis marhale mein ab

un ko meri KHabar hai na un ki KHabar mujhe

maqtal mein ja ghusun main anal-‘ishq chiKHta

shanon pe ab to bojh sa lagta hai sar mujhe

ab tak to mera kaam bhi pura nahin hua

be-waqt mar Dalega marne ka Dar mujhe

tha koi gham-gusar dam-e-marg ai 'nishat'

rote rahe sukun se diwar-o-dar mujhe