lai nahin payam koi zulf-e-yar se

laa.ī nahīñ payām koī zulf-e-yār se

mujh ko shikāyateñ haiñ nasīm-e-bahār se

khelā ho jo darāzī-e-gesū-e-yār se

vo kyā Daregā tūl-e-shab-e-intizār se

āhista ai nasīm ki ye zindagī mirī

miltī huī hai sham-e-sar-e-rah-guzār se

merā hī ek aks hai kyā tuur kyā kalīm

dekhe koī mujhe nigah-e-e'tibār se

ik daaġh hī sahī Thahar ai marg-e-nā-gahāñ

le jaa.eñ kuchh to ālam-e-nā-pā.edār se

mujh ko miTā.e gardish-e-lail-o-nahār kyā

bāhar hai ishq gardish-e-lail-o-nahār se

vo dil ke aa.ine meñ rahe aur mirī nazar

aage baḌhī na ā.ina-e-e'tibār se

ham be-ḳhudān-e-ishq se kyā pursish-e-bahār

pūchho hamāre pairahan-e-tār-tār se

merī tarah unheñ bhī na rusvā kare 'zafar'

Dartā huuñ apne nāla-e-be-iḳhtiyār se

lai nahin payam koi zulf-e-yar se

mujh ko shikayaten hain nasim-e-bahaar se

khela ho jo daraazi-e-gesu-e-yar se

wo kya Darega tul-e-shab-e-intizar se

aahista ai nasim ki ye zindagi meri

milti hui hai sham-e-sar-e-rah-guzar se

mera hi ek aks hai kya tur kya kalim

dekhe koi mujhe nigah-e-e'tibar se

ek dagh hi sahi Thahar ai marg-e-na-gahan

le jaen kuchh to aalam-e-na-paedar se

mujh ko miTae gardish-e-lail-o-nahaar kya

bahar hai ishq gardish-e-lail-o-nahaar se

wo dil ke aaine mein rahe aur meri nazar

aage baDhi na aaina-e-e'tibar se

hum be-KHudan-e-ishq se kya pursish-e-bahaar

puchho hamare pairahan-e-tar-tar se

meri tarah unhen bhi na ruswa kare 'zafar'

Darta hun apne nala-e-be-iKHtiyar se