lakh chaha ruk na paya KHwahishon ka silsila

laakh chāhā ruk na paayā ḳhvāhishoñ kā silsila

nā-tavāñ dil ne uThāyā āñsuoñ kā silsila

kaise ḳhvāhish maiñ karūñ parvāz kī tū hī batā

dil meñ ghuT kar rah gayā jab hasratoñ kā silsila

ghar se ghar ko yuuñ milānā kaam to āsāñ na thā

apne hāthoñ se baḌhāyā nafratoñ kā silsila

tujh ko DhūñDā is tarah jaise ḳhudā hai tū mirā

raah meñ kis ne banāyā maqbaroñ kā silsila

ruuh kī gahrā.iyoñ meñ tū utar kar aa gayā

zehn kī sīḌhī se aaya qurbatoñ kā silsila

tujh ko pā lenā hī merī manzil-e-maqsūd hai

jā-ba-jā kis ne bichhāyā pattharoñ kā silsila

zindagī ke dasht meñ aaya na jab aks-e-bahār

maiñ ne ḳhud ko ḳhud dikhāyā vahshatoñ kā silsila

lakh chaha ruk na paya KHwahishon ka silsila

na-tawan dil ne uThaya aansuon ka silsila

kaise KHwahish main karun parwaz ki tu hi bata

dil mein ghuT kar rah gaya jab hasraton ka silsila

ghar se ghar ko yun milana kaam to aasan na tha

apne hathon se baDhaya nafraton ka silsila

tujh ko DhunDa is tarah jaise KHuda hai tu mera

rah mein kis ne banaya maqbaron ka silsila

ruh ki gahraiyon mein tu utar kar aa gaya

zehn ki siDhi se aaya qurbaton ka silsila

tujh ko pa lena hi meri manzil-e-maqsud hai

ja-ba-ja kis ne bichhaya pattharon ka silsila

zindagi ke dasht mein aaya na jab aks-e-bahaar

main ne KHud ko KHud dikhaya wahshaton ka silsila