lakh dil-mast ho masti ka ayan raaz na ho

laakh dil-mast ho mastī kā ayaañ raaz na ho

ye vo shīsha hai ki TuuTe bhī to āvāz na ho

ḳhauf hai mausam-e-gul meñ ki sabā kā jhoñkā

tā.ir-e-hosh ke haq meñ par-e-parvāz na ho

dil bahut bulbul-e-shaidā kā hai nāzuk gulchīñ

phuul gulzār ke yuuñ toḌ ki āvāz na ho

kyā qayāmat hai vo dil toḌ rahe haiñ merā

is gumāñ par ki chhupā is meñ koī raaz na ho

ā.īna haath meñ hai husn kā nazzāra hai

un se kah do mirī hālat nazar-andāz na ho

ho ke vo mast-e-mai-e-nāz gale lipTe haiñ

hosh kambaḳht kahīñ tafraqa-pardāz na ho

us giraftār kī pūchho na taḌap jis ke liye

dar qafas kā ho khulā tāqat-e-parvāz na ho

ahl-e-dil ko jo luTātī hai sadā naġhme kī

parda-e-sāz meñ pinhāñ tirī āvāz na ho

thaam lene do kaleja mujhe hāthoñ se 'jalīl'

qissa-e-dard-e-jigar kā abhī āġhāz na ho

lakh dil-mast ho masti ka ayan raaz na ho

ye wo shisha hai ki TuTe bhi to aawaz na ho

KHauf hai mausam-e-gul mein ki saba ka jhonka

tair-e-hosh ke haq mein par-e-parwaz na ho

dil bahut bulbul-e-shaida ka hai nazuk gulchin

phul gulzar ke yun toD ki aawaz na ho

kya qayamat hai wo dil toD rahe hain mera

is guman par ki chhupa is mein koi raaz na ho

aaina hath mein hai husn ka nazzara hai

un se kah do meri haalat nazar-andaz na ho

ho ke wo mast-e-mai-e-naz gale lipTe hain

hosh kambaKHt kahin tafraqa-pardaz na ho

us giraftar ki puchho na taDap jis ke liye

dar qafas ka ho khula taqat-e-parwaz na ho

ahl-e-dil ko jo luTati hai sada naghme ki

parda-e-saz mein pinhan teri aawaz na ho

tham lene do kaleja mujhe hathon se 'jalil'

qissa-e-dard-e-jigar ka abhi aaghaz na ho