lakh unchi sahi ai dost kisi ki aawaz

laakh ūñchī sahī ai dost kisī kī āvāz

apnī āvāz bahar-e-hāl hai apnī āvāz

ab kueñ par nazar aatā nahīñ pyāsoñ kā hujūm

tere pāzeb kī kyā TuuT ke bikhrī āvāz

vo kisī chhat kisī dīvār se roke na rukī

garm hoñToñ ke tasādum se jo ubhrī āvāz

logo sach mat kaho sach kī nahīñ qīmat koī

kisī dīvāne kī sannāTe meñ gūñjī āvāz

būḌhī sadiyoñ kī jaḌeñ kaaT diyā kartī hai

choT khaa.e hue jazbāt kī zaḳhmī āvāz

maiñ ne jab jab kahā tishna haiñ adab kī qadreñ

dab ga.ī kitnī hī āvāzoñ meñ merī āvāz

vaz.a-dārī ne kahīñ kā nahīñ rakkhā 'zāhid'

varna kitnoñ ne badal rakkhī hai apnī āvāz

lakh unchi sahi ai dost kisi ki aawaz

apni aawaz bahar-e-haal hai apni aawaz

ab kuen par nazar aata nahin pyason ka hujum

tere pazeb ki kya TuT ke bikhri aawaz

wo kisi chhat kisi diwar se roke na ruki

garm honTon ke tasadum se jo ubhri aawaz

logo sach mat kaho sach ki nahin qimat koi

kisi diwane ki sannaTe mein gunji aawaz

buDhi sadiyon ki jaDen kaT diya karti hai

choT khae hue jazbaat ki zaKHmi aawaz

main ne jab jab kaha tishna hain adab ki qadren

dab gai kitni hi aawazon mein meri aawaz

waza-dari ne kahin ka nahin rakkha 'zahid'

warna kitnon ne badal rakkhi hai apni aawaz