lab-e-KHamosh mein pinhan hai koi raaz nahin

lab-e-ḳhāmosh meñ pinhāñ hai koī raaz nahīñ

zindagī saaz hai jis meñ koī āvāz nahīñ

kyuuñ na āġhosh-e-taḳhaiyul meñ maiñ uḌtā hī rahūñ

dar-haqīqat hai mujhe ḳhvāhish-e-parvāz nahīñ

mere kirdār meñ hai nekī badī par bhārī

kyuuñ vo kar paa.e badī ko nazar-andāz nahīñ

ye ta.alluq jo kiyā qat.a huā qissa tamām

ye na.ī dāstāñ kā nuqta-e-āġhāz nahīñ

rū-ba-rū aa.ine ke jā.ūñ to dikhtā hai mujhe

ajnabī shaḳhs jo ham-shakl-o-ham-āvāz nahīñ

huuñ to hargiz nahīñ pāband-e-qavā.ed 'nāqid'

apnī āvārgī pe mujh ko magar naaz nahīñ

lab-e-KHamosh mein pinhan hai koi raaz nahin

zindagi saz hai jis mein koi aawaz nahin

kyun na aaghosh-e-taKHaiyul mein main uDta hi rahun

dar-haqiqat hai mujhe KHwahish-e-parwaz nahin

mere kirdar mein hai neki badi par bhaari

kyun wo kar pae badi ko nazar-andaz nahin

ye talluq jo kiya qata hua qissa tamam

ye nai dastan ka nuqta-e-aghaz nahin

ru-ba-ru aaine ke jaun to dikhta hai mujhe

ajnabi shaKHs jo ham-shakl-o-ham-awaz nahin

hun to hargiz nahin paband-e-qawaed 'naqid'

apni aawargi pe mujh ko magar naz nahin