lab-e-KHamosh se ifsha hoga

lab-e-ḳhāmosh se ifshā hogā

raaz har rañg meñ rusvā hogā

dil ke sahrā meñ chalī sard havā

abr gulzār pe barsā hogā

tum nahīñ the to sar-e-bām-e-ḳhayāl

yaad kā koī sitāra hogā

kis tavaqqo.a pe kisī ko dekheñ

koī tum se bhī hasīñ kyā hogā

zīnat-e-halqa-e-āġhosh bano

duur baiThoge to charchā hogā

jis bhī fankār kā shahkār ho tum

us ne sadiyoñ tumheñ sochā hogā

aaj kī raat bhī tanhā hī kaTī

aaj ke din bhī añdherā hogā

kis qadar karb se chaTkī hai kalī

shāḳh se gul koī TuuTā hogā

umr bhar ro.e faqat is dhun meñ

raat bhīgī to ujālā hogā

saarī duniyā hameñ pahchāntī hai

koī ham sā bhī na tanhā hogā

lab-e-KHamosh se ifsha hoga

raaz har rang mein ruswa hoga

dil ke sahra mein chali sard hawa

abr gulzar pe barsa hoga

tum nahin the to sar-e-baam-e-KHayal

yaad ka koi sitara hoga

kis tawaqqoa pe kisi ko dekhen

koi tum se bhi hasin kya hoga

zinat-e-halqa-e-aghosh bano

dur baiThoge to charcha hoga

jis bhi fankar ka shahkar ho tum

us ne sadiyon tumhein socha hoga

aaj ki raat bhi tanha hi kaTi

aaj ke din bhi andhera hoga

kis qadar karb se chaTki hai kali

shaKH se gul koi TuTa hoga

umr bhar roe faqat is dhun mein

raat bhigi to ujala hoga

sari duniya hamein pahchanti hai

koi hum sa bhi na tanha hoga