lab-e-KHamosh se usne KHush-amdid kaha

lab-e-ḳhamosh se us ne ḳhush-āmdīd kahā

usī ko logoñ ne phir guft aur shunīd kahā

bahār-e-lāla-o-gul se ḳhizāñ kī aahaT tak

har ek vāqi.a mausam ne chashm-dīd kahā

junūñ meñ pahle to iqrār kar liyā us ne

junūñ kī baat ko phir aql se ba.iid kahā

hasīn tabsira mausam pe jab tamām huā

to us ne kaan meñ chupke se kuchh mazīd kahā

tirā ḳhayāl kiyā ham ne vasl se ta.abīr

tirī galī se guzarne ko bāzdīd kahā

na ham se pūchhā gayā zabt kā sabab koī

na ham ne dard ko apne kabhī shadīd kahā

mirī sarisht-e-'suḳhan' meñ haiñ kuchh na.e uslūb

na.ī ġhazal ne mujhe bhī ḳhush-āmdīd kahā

lab-e-KHamosh se us ne KHush-amdid kaha

usi ko logon ne phir guft aur shunid kaha

bahaar-e-lala-o-gul se KHizan ki aahaT tak

har ek waqia mausam ne chashm-did kaha

junun mein pahle to iqrar kar liya us ne

junun ki baat ko phir aql se baid kaha

hasin tabsira mausam pe jab tamam hua

to us ne kan mein chupke se kuchh mazid kaha

tera KHayal kiya hum ne wasl se tabir

teri gali se guzarne ko bazdid kaha

na hum se puchha gaya zabt ka sabab koi

na hum ne dard ko apne kabhi shadid kaha

meri sarisht-e-'suKHan' mein hain kuchh nae uslub

nai ghazal ne mujhe bhi KHush-amdid kaha