lab hain KHamosh aankh tabassum-farosh hai

lab haiñ ḳhamosh aañkh tabassum-farosh hai

uf ye adā-e-nāz qayāmat-ba-dosh hai

har chashm bazm-e-nāz meñ hairat-farosh hai

vāraftagī meñ kis ko nazāre kā hosh hai

ai ḳhizr-e-shauq aa mire baazū ko thaam le

manzil hai duur raah meñ zulmat kā josh hai

kyoñ iltimās-e-shauq pashemāñ na ho mirā

husn-e-fareb-kār abhī tak ḳhamosh hai

rangīñ naqāb ruḳh se uThā ai jamāl-e-yār

phir merī aañkh zauq-e-tamāshā-ba-dosh hai

āshufta-hāl haiñ tire dīvāngān-e-shauq

dāman kī kuchh ḳhabar na garebāñ kā hosh hai

hai chashm-e-shauq nargis-e-pur-fan se ham-suḳhan

go maiñ idhar ḳhamosh udhar vo ḳhamosh hai

kyā pūchhte ho ab dil-e-hasrat-zada kā haal

vo soz-o-sāz hai na vo josh-o-ḳharosh hai

aise meñ ham se kyoñ na ho sarzad gunāh-e-shauq

bebāk phir vo nargis-e-sahbā-farosh hai

yaad aa.e ibtidā-e-mohabbat ke phir maze

phir iztirāb-e-shauq kā siine meñ josh hai

kyoñ nukta-āfrīñ na tirī tab.a ho 'valī'

'ġhālib' kī tarah ye bhī navā-e-sarosh hai

lab hain KHamosh aankh tabassum-farosh hai

uf ye ada-e-naz qayamat-ba-dosh hai

har chashm bazm-e-naz mein hairat-farosh hai

waraftagi mein kis ko nazare ka hosh hai

ai KHizr-e-shauq aa mere bazu ko tham le

manzil hai dur rah mein zulmat ka josh hai

kyon iltimas-e-shauq pasheman na ho mera

husn-e-fareb-kar abhi tak KHamosh hai

rangin naqab ruKH se uTha ai jamal-e-yar

phir meri aankh zauq-e-tamasha-ba-dosh hai

aashufta-haal hain tere diwangan-e-shauq

daman ki kuchh KHabar na gareban ka hosh hai

hai chashm-e-shauq nargis-e-pur-fan se ham-suKHan

go main idhar KHamosh udhar wo KHamosh hai

kya puchhte ho ab dil-e-hasrat-zada ka haal

wo soz-o-saz hai na wo josh-o-KHarosh hai

aise mein hum se kyon na ho sarzad gunah-e-shauq

bebak phir wo nargis-e-sahba-farosh hai

yaad aae ibtida-e-mohabbat ke phir maze

phir iztirab-e-shauq ka sine mein josh hai

kyon nukta-afrin na teri taba ho 'wali'

'ghaalib' ki tarah ye bhi nawa-e-sarosh hai