lab-e-mantiq rahe koi na chashm-e-lan-tarani ho

lab-e-mantiq rahe koī na chashm-e-lan-tarānī ho

zamīñ phir se murattab ho falak par nazar-e-sānī ho

abhī tak ham ne jo māñgā tire shāyāñ nahīñ māñgā

sikhā de ham ko kun kahnā jo terī mehrbānī ho

ḳhas-e-be-mājrā haiñ ḳhaar be-bāzār haiñ to kyā

numū-shahkār ham bhī haiñ hamārī bhī kisānī ho

mileñge dhuup kī maarī chaTānoñ meñ bhī ḳhvāb-e-nam

koī ḳhushkī nahīñ aisī jahāñ tah meñ na paanī ho

lahū ko bhī tanaffus hī ravāñ rakhtā hai ḳhaliyoñ meñ

bahe sahrā meñ bhī kashtī agar zor-e-duḳhānī ho

baḌā surḳhāb par niklā badan kā ḳhūñ-chakāñ rahnā

shafaq sayyāh kī lāzim thī rañgat arġhavānī ho

taḳhātub ke liye 'tafzīl' abjad mere hāzir haiñ

koī naqqāra-ḳhāna ho ki bait be-zabānī ho

lab-e-mantiq rahe koi na chashm-e-lan-tarani ho

zamin phir se murattab ho falak par nazar-e-sani ho

abhi tak hum ne jo manga tere shayan nahin manga

sikha de hum ko kun kahna jo teri mehrbani ho

KHas-e-be-majra hain KHar be-bazar hain to kya

numu-shahkar hum bhi hain hamari bhi kisani ho

milenge dhup ki mari chaTanon mein bhi KHwab-e-nam

koi KHushki nahin aisi jahan tah mein na pani ho

lahu ko bhi tanaffus hi rawan rakhta hai KHaliyon mein

bahe sahra mein bhi kashti agar zor-e-duKHani ho

baDa surKHab par nikla badan ka KHun-chakan rahna

shafaq sayyah ki lazim thi rangat arghawani ho

taKHatub ke liye 'tafzil' abjad mere hazir hain

koi naqqara-KHana ho ki bait be-zabani ho