lab-o-ruKHsar o jabin se miliye

lab-o-ruḳhsār o jabīñ se miliye

jī nahīñ bhartā kahīñ se miliye

yuuñ na is dil ke makīñ se miliye

āsmāñ ban ke zamīñ se miliye

ghuT ke rah jaatī hai rusvā.ī tak

kyā kisī parda-nashīñ se miliye

kyuuñ haram meñ ye ḳhayāl aatā hai

ab kisī dushman-e-dīñ se miliye

jī na bahle ram-e-āhū se to phir

tā.er-e-sidra-nashīñ se miliye

bujh gayā dil to ḳharābī huī hai

phir kisī shola-jabīñ se miliye

vo koī hākim-e-daurāñ to nahīñ

mat Dareñ un kī nahīñ se miliye

lab-o-ruKHsar o jabin se miliye

ji nahin bharta kahin se miliye

yun na is dil ke makin se miliye

aasman ban ke zamin se miliye

ghuT ke rah jati hai ruswai tak

kya kisi parda-nashin se miliye

kyun haram mein ye KHayal aata hai

ab kisi dushman-e-din se miliye

ji na bahle ram-e-ahu se to phir

taer-e-sidra-nashin se miliye

bujh gaya dil to KHarabi hui hai

phir kisi shola-jabin se miliye

wo koi hakim-e-dauran to nahin

mat Daren un ki nahin se miliye