lab par jo mere aah-e-gham-alud nahin hai

lab par jo mire āh-e-ġham-ālūd nahīñ hai

iz.hār-e-mohabbat mujhe maqsūd nahīñ hai

ham jaise faqīroñ ko to yuuñ bhī na kahe vo

phir aa.iyo kuchh is ghaḌī maujūd nahīñ hai

kahtā huuñ maiñ ye gabr o musalmān ke muñh par

vo abd nahīñ jis kā tū ma.abūd nahīñ hai

narmā.e hai kis tarah se is āhan-e-dil ko

ye aah agar naġhma-e-dā.ūd yahīñ hai

phirte haiñ ka.ī qais se hairān o pareshān

is ishq kī sarkār meñ bahbūd nahīñ hai

tāsīr madad kījiyo ab siine meñ apne

is naale se ik aah bhī afzūd nahīñ hai

ḳhūbī-e-ayāz aaphī nazar aa ga.ī hotī

afsos tire ahd meñ mahmūd nahīñ hai

is ātish-e-furqat ke sivā dahr meñ 'joshish'

dekhā to kahīñ ātish-e-be-dūd nahīñ hai

lab par jo mere aah-e-gham-alud nahin hai

izhaar-e-mohabbat mujhe maqsud nahin hai

hum jaise faqiron ko to yun bhi na kahe wo

phir aaiyo kuchh is ghaDi maujud nahin hai

kahta hun main ye gabr o musalman ke munh par

wo abd nahin jis ka tu mabud nahin hai

narmae hai kis tarah se is aahan-e-dil ko

ye aah agar naghma-e-daud yahin hai

phirte hain kai qais se hairan o pareshan

is ishq ki sarkar mein bahbud nahin hai

tasir madad kijiyo ab sine mein apne

is nale se ek aah bhi afzud nahin hai

KHubi-e-ayaz aaphi nazar aa gai hoti

afsos tere ahd mein mahmud nahin hai

is aatish-e-furqat ke siwa dahr mein 'joshish'

dekha to kahin aatish-e-be-dud nahin hai