labon pe aah to aankhon se ashk-bari hai

laboñ pe aah to āñkhoñ se ashk-bārī hai

jo sach kahūñ to tirā ishq ishtihārī hai

go āftāb se bichhḌe use zamāna huā

zamīñ kā ab bhī musalsal tavāf jaarī hai

batā gayā yahī āñkhoñ meñ Duub kar sūraj

shab-e-firāq bahut aaj tujh pe bhārī hai

zabāñ ḳhamosh magar chīḳhte haiñ ḳhāl-o-ḳhad

ye kaisā sabr hai ye kaisī burd-bārī hai

tamām umr hī be-samtiyāñ rahīñ haa.il

abhī bhī mujh meñ musalsal safar ye jaarī hai

dhuāñ dhuāñ hai nazar gard gard hai manzar

darūn-e-ḳhāna koī mujh meñ jang jaarī hai

tumhārī sard-ravī se hī munjamid hai lahū

ye sirf kahne ko mausam kī barf-bārī hai

lahū se sīñch rahī huuñ maiñ 'tārā' barg-e-suḳhan

na ye samajhnā ki ashkoñ kī ābiyārī hai

labon pe aah to aankhon se ashk-bari hai

jo sach kahun to tera ishq ishtihaari hai

go aaftab se bichhDe use zamana hua

zamin ka ab bhi musalsal tawaf jari hai

bata gaya yahi aankhon mein Dub kar suraj

shab-e-firaq bahut aaj tujh pe bhaari hai

zaban KHamosh magar chiKHte hain KHal-o-KHad

ye kaisa sabr hai ye kaisi burd-bari hai

tamam umr hi be-samtiyan rahin hail

abhi bhi mujh mein musalsal safar ye jari hai

dhuan dhuan hai nazar gard gard hai manzar

darun-e-KHana koi mujh mein jang jari hai

tumhaari sard-rawi se hi munjamid hai lahu

ye sirf kahne ko mausam ki barf-bari hai

lahu se sinch rahi hun main 'tara' barg-e-suKHan

na ye samajhna ki ashkon ki aabiyari hai