laDai ho to kaghaz ki sipar se kuchh nahin hota

laḌā.ī ho to kāġhaz kī sipar se kuchh nahīñ hotā

tumhārī yā kisī kī chashm-e-tar se kuchh nahīñ hotā

ragoñ meñ hai añdherā to ye roz-o-shab hī kaafī haiñ

hadīs-e-ḳhair se yā harf-e-shar se kuchh nahīñ hotā

koī saa.at muqarrar hai kahīñ ik mustajābī kī

kaf-e-afsos se dast-e-hunar se kuchh nahīñ hotā

unheñ un ke havārī ham-suḳhan badnām karte haiñ

tirī afvāh se merī ḳhabar se kuchh nahīñ hotā

kaḌe din kaTte kaTte bhī saroñ kī fasl kaTtī hai

ki dasht-e-karbalā meñ ek sar se kuchh nahīñ hotā

makān apne makīnoñ se hasīñ aur ḳhūbsūrat haiñ

faqat ārā.ish-e-dīvār-o-dar se kuchh nahīñ hotā

junūñ ko chāhiye ik tesha-e-a.amāl kā mausam

yahāñ alfāz ke zer-o-zabar se kuchh nahīñ hotā

bahut baḌh jaatī hai sanjīdgī jab donoñ jānib to

sivā afsos ke hāsil safar se kuchh nahīñ hotā

'kafīl' ik sā.ebāñ sar par rahe maañ kī duāoñ kā

mirā nuqsāñ kisī hāsid nazar se kuchh nahīñ hotā

laDai ho to kaghaz ki sipar se kuchh nahin hota

tumhaari ya kisi ki chashm-e-tar se kuchh nahin hota

ragon mein hai andhera to ye roz-o-shab hi kafi hain

hadis-e-KHair se ya harf-e-shar se kuchh nahin hota

koi saat muqarrar hai kahin ek mustajabi ki

kaf-e-afsos se dast-e-hunar se kuchh nahin hota

unhen un ke hawari ham-suKHan badnam karte hain

teri afwah se meri KHabar se kuchh nahin hota

kaDe din kaTte kaTte bhi saron ki fasl kaTti hai

ki dasht-e-karbala mein ek sar se kuchh nahin hota

makan apne makinon se hasin aur KHubsurat hain

faqat aaraish-e-diwar-o-dar se kuchh nahin hota

junun ko chahiye ek tesha-e-amal ka mausam

yahan alfaz ke zer-o-zabar se kuchh nahin hota

bahut baDh jati hai sanjidgi jab donon jaanib to

siwa afsos ke hasil safar se kuchh nahin hota

'kafil' ek saeban sar par rahe man ki duaon ka

mera nuqsan kisi hasid nazar se kuchh nahin hota