lafz to hon lab-e-guftar na rahne pae

lafz to hoñ lab-e-iz.hār na rahne paa.e

ab samā.at pe koī baar na rahne paa.e

kis tarah ke haiñ makīñ jin kī tag-o-dau hai yahī

dar to baaqī raheñ dīvār na rahne paa.e

is meñ bhī pahlu-e-taskīn nikal aatā hai

ek hī sūrat-e-āzār na rahne paa.e

zehn-tā-zehn mahaktā hī rahe zaḳhm-e-hunar

fasl-e-harf o lab-e-iz.hār na rahne paa.e

ab ke mausam meñ ye meyār-e-junūñ Thahrā hai

sar salāmat raheñ dastār na rahne paa.e

koī darmāñ ki havā chīḳh rahī hai 'mohsin'

naḳhl-e-hastī pe koī baar na rahne paa.e

lafz to hon lab-e-izhaar na rahne pae

ab samaat pe koi bar na rahne pae

kis tarah ke hain makin jin ki tag-o-dau hai yahi

dar to baqi rahen diwar na rahne pae

is mein bhi pahlu-e-taskin nikal aata hai

ek hi surat-e-azar na rahne pae

zehn-ta-zehn mahakta hi rahe zaKHm-e-hunar

fasl-e-harf o lab-e-izhaar na rahne pae

ab ke mausam mein ye meyar-e-junun Thahra hai

sar salamat rahen dastar na rahne pae

koi darman ki hawa chiKH rahi hai 'mohsin'

naKHl-e-hasti pe koi bar na rahne pae