lagga na khate zawiye the KHadd-o-Khaal ke

laggā na khāte zāviye the ḳhadd-o-ḳhāl ke

dekhā hai aa.ine se bhī un ko nikāl ke

phaTkār aisī khaa.ī hai ab mujh faqīr se

duniyā karegī baat magar muñh sañbhāl ke

hiltī hai maiñ jo Tek lagā.ūñ to kyā bhalā

dīvār ḳhvāb dekhegī chīte kī khaal ke

kuchh baḌbaḌā rahe haiñ parinde ye ḳhvāb meñ

yā patte sarsarāne lage phir se Daal ke

shāyad Tale kisī se shab-e-hijr kī balā

ham ne to apnī tarh se dekhā hai Taal ke

khichḌī abhī banī nahīñ hai 'ishq kī magar

daane nikalne lag ga.e chāval meñ daal ke

kuchh uTh ga.e haiñ she'r tire sun ke ab yahāñ

baiThe haiñ shā.eqīn ye merī dhamāl ke

chaukhaT pe Thoñk dī hai bataur-e-nazar-guzar

sāhab haiñ mo'taqid baḌe ghoḌe kī naal ke

tārīḳh ham ko yaad karegī qurūn tak

ham log haiñ zamāna-e-qaht-ur-rijāl ke

ye jo havas hai aag hai is aag meñ 'shafaq'

jalte haiñ ḳhvāb tāza-nihāloñ kī chhāl ke

lagga na khate zawiye the KHadd-o-KHal ke

dekha hai aaine se bhi un ko nikal ke

phaTkar aisi khai hai ab mujh faqir se

duniya karegi baat magar munh sanbhaal ke

hilti hai main jo Tek lagaun to kya bhala

diwar KHwab dekhegi chite ki khaal ke

kuchh baDbaDa rahe hain parinde ye KHwab mein

ya patte sarsarane lage phir se Dal ke

shayad Tale kisi se shab-e-hijr ki bala

hum ne to apni tarh se dekha hai Tal ke

khichDi abhi bani nahin hai 'ishq ki magar

dane nikalne lag gae chawal mein dal ke

kuchh uTh gae hain she'r tere sun ke ab yahan

baiThe hain shaeqin ye meri dhamal ke

chaukhaT pe Thonk di hai bataur-e-nazar-guzar

sahab hain mo'taqid baDe ghoDe ki nal ke

tariKH hum ko yaad karegi qurun tak

hum log hain zamana-e-qaht-ur-rijal ke

ye jo hawas hai aag hai is aag mein 'shafaq'

jalte hain KHwab taza-nihaalon ki chhaal ke