lagta hai magar aankh ka dhoka nahin hota

lagtā hai magar aañkh kā dhoka nahīñ hotā

hotā hai kabhī vo bhī jo sochā nahīñ hotā

bhijvā.e kabhī phuul to ḳhud aatā nahīñ hai

ḳhud aa.e to baḌh kar koī tohfa nahīñ hotā

hotā hai hazāroñ meñ koī ek yahāñ yuuñ

hone se jahāñ jis ke akelā nahīñ hotā

kuchh beloñ kī bantī nahīñ bārish se ziyāda

kuchh bātoñ pe ronā kabhī achchhā nahīñ hotā

ham ret pe likh lete haiñ har zaḳhm kī tārīḳh

agle kā namakdān bhī giilā nahīñ hotā

ab kis ke liye kurte yā saaḌī kā takalluf

ab aisī ḳharīdārī pe ḳharcha nahīñ hotā

kaam aate haiñ aksar vahī fehrist meñ number

kaam aane kī ḳhātir jinheñ rakkhā nahīñ hotā

lagta hai magar aankh ka dhoka nahin hota

hota hai kabhi wo bhi jo socha nahin hota

bhijwae kabhi phul to KHud aata nahin hai

KHud aae to baDh kar koi tohfa nahin hota

hota hai hazaron mein koi ek yahan yun

hone se jahan jis ke akela nahin hota

kuchh belon ki banti nahin barish se ziyaada

kuchh baaton pe rona kabhi achchha nahin hota

hum ret pe likh lete hain har zaKHm ki tariKH

agle ka namakdan bhi gila nahin hota

ab kis ke liye kurte ya saDi ka takalluf

ab aisi KHaridari pe KHarcha nahin hota

kaam aate hain aksar wahi fehrist mein number

kaam aane ki KHatir jinhen rakkha nahin hota