lagta nahin hai dil mera ujDe dayar mein

lagtā nahīñ hai dil mirā ujḌe dayār meñ

ik umr kaT ga.ī hai tire intizār meñ

qaa.em raheñ ḳhudā-rā mirī sab ye hasrateñ

dūñgā jagah inheñ bhī dil-e-dāġh-dār meñ

ḳhāroñ se vāsta hameñ haiñ ḳhaar hī aziiz

gul hī to haiñ jo vāzeh hue shakl-e-ḳhār meñ

patjhaḌ ke mausamoñ meñ huī zindagī tamām

aatī nazar bahār nahīñ hai bahār meñ

ruk ruk ke rakh rahā huuñ rah-e-āshiqī meñ paañv

kāñTe bichhā diye haiñ tumhīñ ne to pyaar meñ

dāman bhigo sake mire ashkoñ meñ Dhal sake

itnā lahū kahāñ hai dil-e-dāġhdār meñ

jis ḳhāk-e-pā kī khoj meñ tū thak gayā hai 'ġham'

milnā hai ek din isī gard-o-ġhubār meñ

lagta nahin hai dil mera ujDe dayar mein

ek umr kaT gai hai tere intizar mein

qaem rahen KHuda-ra meri sab ye hasraten

dunga jagah inhen bhi dil-e-dagh-dar mein

KHaron se wasta hamein hain KHar hi aziz

gul hi to hain jo wazeh hue shakl-e-KHar mein

patjhaD ke mausamon mein hui zindagi tamam

aati nazar bahaar nahin hai bahaar mein

ruk ruk ke rakh raha hun rah-e-ashiqi mein panw

kanTe bichha diye hain tumhin ne to pyar mein

daman bhigo sake mere ashkon mein Dhal sake

itna lahu kahan hai dil-e-daghdar mein

jis KHak-e-pa ki khoj mein tu thak gaya hai 'gham'

milna hai ek din isi gard-o-ghubar mein