laghzishon se mawara tu bhi nahin main bhi nahin

laġhzishoñ se māvarā tū bhī nahīñ maiñ bhī nahīñ

donoñ insāñ haiñ ḳhudā tū bhī nahīñ maiñ bhī nahīñ

tū mujhe aur maiñ tujhe ilzām detā huuñ magar

apne andar jhāñktā tū bhī nahīñ maiñ bhī nahīñ

maslahat ne kar diyā donoñ meñ paidā iḳhtilāf

varna fitrat kā burā tū bhī nahīñ maiñ bhī nahīñ

chāhte donoñ bahut ik dūsre ko haiñ magar

ye haqīqat māntā tū bhī nahīñ maiñ bhī nahīñ

jurm kī nauiyyatoñ meñ kuchh tafāvut ho to ho

dar-haqīqat pārsā tū bhī nahīñ maiñ bhī nahīñ

raat bhī vīrāñ fasīl-e-shahr bhī TuuTī huī

aur sitam ye jāgtā tū bhī nahīñ maiñ bhī nahīñ

jān-e-'ārif' tū bhī ziddī thā anā mujh meñ bhī thī

donoñ ḳhud-sar the jhukā tū bhī nahīñ maiñ bhī nahīñ

laghzishon se mawara tu bhi nahin main bhi nahin

donon insan hain KHuda tu bhi nahin main bhi nahin

tu mujhe aur main tujhe ilzam deta hun magar

apne andar jhankta tu bhi nahin main bhi nahin

maslahat ne kar diya donon mein paida iKHtilaf

warna fitrat ka bura tu bhi nahin main bhi nahin

chahte donon bahut ek dusre ko hain magar

ye haqiqat manta tu bhi nahin main bhi nahin

jurm ki nauiyyaton mein kuchh tafawut ho to ho

dar-haqiqat parsa tu bhi nahin main bhi nahin

raat bhi viran fasil-e-shahr bhi TuTi hui

aur sitam ye jagta tu bhi nahin main bhi nahin

jaan-e-'arif' tu bhi ziddi tha ana mujh mein bhi thi

donon KHud-sar the jhuka tu bhi nahin main bhi nahin