lahu ka dagh na tha zaKHm ka nishan na tha

lahū kā daaġh na thā zaḳhm kā nishān na thā

vo mar chukā thā kisī ko magar gumān na thā

maiñ chal paḌā thā kahīñ ajnabī dishāoñ meñ

havā kā zor thā kashtī meñ bādbān na thā

maiñ us makān meñ muddat se qaid thā ki jahāñ

koī zamīn na thī koī āsamān na thā

mirī shikast mirī fat.h kuchh nahīñ ya.anī

vo hādsa thā koī merā imtihān na thā

tumhāre daur meñ har aadmī hai but kī tarah

hamāre ahd meñ patthar bhī be-zabān na thā

kisī khañDar meñ hī mujh ko diyā jalānā paḌā

chamakte shahr meñ merā koī makān na thā

maiñ sabz rañg kā chashma pahan chukā thā 'kalīm'

mirī nigāh meñ manzar lahūluhān na thā

lahu ka dagh na tha zaKHm ka nishan na tha

wo mar chuka tha kisi ko magar guman na tha

main chal paDa tha kahin ajnabi dishaon mein

hawa ka zor tha kashti mein baadban na tha

main us makan mein muddat se qaid tha ki jahan

koi zamin na thi koi aasaman na tha

meri shikast meri fath kuchh nahin yani

wo hadsa tha koi mera imtihan na tha

tumhaare daur mein har aadmi hai but ki tarah

hamare ahd mein patthar bhi be-zaban na tha

kisi khanDar mein hi mujh ko diya jalana paDa

chamakte shahr mein mera koi makan na tha

main sabz rang ka chashma pahan chuka tha 'kalim'

meri nigah mein manzar lahuluhan na tha