lahu ka hunar aazmate rahenge

lahū kā hunar āzmāte raheñge

charāġh āñdhiy.oñ meñ jalāte raheñge

zamāna sitam ham pe Dhātā rahegā

har ik ġham pe ham muskurāte raheñge

samāñ ho ḳhushī kā yā ġham kā ho mausam

ham apnā fasāna sunāte raheñge

raheñge ravāñ merī āñkhoñ se aañsū

sitāre yūñhī jhilmilāte raheñge

na badlegī jab tak fazā gulsitāñ kī

ham apne lahū meñ nahāte raheñge

musallat kahāñ tak raheñge añdhere

mire zaḳhm-e-dil jagmagāte raheñge

mohabbat ke dushman haiñ jitne bhī 'najma'

unheñ aa.ina ham dikhāte raheñge

lahu ka hunar aazmate rahenge

charagh aandhiyon mein jalate rahenge

zamana sitam hum pe Dhata rahega

har ek gham pe hum muskuraate rahenge

saman ho KHushi ka ya gham ka ho mausam

hum apna fasana sunate rahenge

rahenge rawan meri aankhon se aansu

sitare yunhi jhilmilate rahenge

na badlegi jab tak faza gulsitan ki

hum apne lahu mein nahate rahenge

musallat kahan tak rahenge andhere

mere zaKHm-e-dil jagmagate rahenge

mohabbat ke dushman hain jitne bhi 'najma'

unhen aaina hum dikhate rahenge