lahu mein gharq adhuri kahaniyan niklin

lahū meñ ġharq adhūrī kahāniyāñ niklīñ

dahan se TuuTī huī surḳh chūḌiyāñ niklīñ

maiñ jis zamīn pe sadiyoñ phirā kiyā tanhā

usī zamīn se kitnī hī bastiyāñ niklīñ

jahāñ muhāl thā paanī kā ek qatra bhī

vahāñ se TuuTī huī chand kashtiyāñ niklīñ

masal diyā thā sar-e-shām ek jugnūñ ko

tamām raat ḳhayāloñ se bijliyāñ niklīñ

churā liyā thā havelī kā ik chhupā manzar

usī gunāh par āñkhoñ se putliyāñ nikleñ

vo ik charāġh jalā aur vo raushnī phailī

vo rahzanī ke irāde se āñdhiyāñ niklīñ

vo bach sakīñ na kabhī bul-havas parindoñ se

hisār-e-āb se bāhar jo machhliyāñ niklīñ

ḳhudā kā shukr ki is ahd-be-libāsī meñ

ye kam nahīñ ki daraḳhtoñ meñ patiyāñ niklīñ

yahī hai qasr-e-mohabbat kī dāstāñ 'kāzim'

girī fasīl to insāñ kī haDDiyāñ niklīñ

lahu mein gharq adhuri kahaniyan niklin

dahan se TuTi hui surKH chuDiyan niklin

main jis zamin pe sadiyon phira kiya tanha

usi zamin se kitni hi bastiyan niklin

jahan muhaal tha pani ka ek qatra bhi

wahan se TuTi hui chand kashtiyan niklin

masal diya tha sar-e-sham ek jugnun ko

tamam raat KHayalon se bijliyan niklin

chura liya tha haweli ka ek chhupa manzar

usi gunah par aankhon se putliyan niklen

wo ek charagh jala aur wo raushni phaili

wo rahzani ke irade se aandhiyan niklin

wo bach sakin na kabhi bul-hawas parindon se

hisar-e-ab se bahar jo machhliyan niklin

KHuda ka shukr ki is ahd-be-libasi mein

ye kam nahin ki daraKHton mein patiyan niklin

yahi hai qasr-e-mohabbat ki dastan 'kazim'

giri fasil to insan ki haDDiyan niklin