laKHt-e-jigar to apne yak-laKHt ro chuka tha

laḳht-e-jigar to apne yak-laḳht ro chukā thā

ashk-e-faqat kā jhamkā āñkhoñ se lag rahā thā

dāman meñ aaj dekhā phir laḳht maiñ le aayā

TukḌā koī jigar kā palkoñ meñ rah gayā thā

us qaid-e-jeb se maiñ chhoTā junūñ kī daulat

varna galā ye merā juuñ tauq meñ phañsā thā

musht-e-namak kī ḳhātir is vāste huuñ hairāñ

kal zaḳhm-e-dil nihāyat dil ko mire lagā thā

ai gard-bād mat de har aan arz-e-vahshat

maiñ bhī kasū zamāne is kaam meñ balā thā

bin kuchh kahe sunā hai aalam se maiñ ne kyā kyā

par tū ne yuuñ na jaanā ai bevafā ki kyā thā

rotī hai sham.a itnā har shab ki kuchh na pūchho

maiñ soz-e-dil ko apne majlis meñ kyuuñ kahā thā

shab zaḳhm-e-sīna uupar chhiḌkā thā maiñ namak ko

nāsūr to kahāñ thā zālim baḌā maza thā

sar maar kar huā thā maiñ ḳhaak us galī meñ

siine pe mujh ko us kā mazkūr naqsh-e-pā thā

so baḳht-e-tīra se huuñ pāmālī-e-sabā meñ

us din ke vāste maiñ kyā ḳhaak meñ milā thā

ye sar-guzasht merī afsāna jo huī hai

mazkūr us kā us ke kūche meñ jā-ba-jā thā

sun kar kisī se vo bhī kahne lagā thā kuchh kuchh

be-dard kitne bole haañ us ko kyā huā thā

kahne lagā ki jaane merī balā azīzāñ

ahvāl thā kisī kā kuchh maiñ bhī sun liyā thā

āñkheñ mirī khulīñ jab jī 'mīr' kā gayā tab

dekhe se us ko varna merā bhī jī jalā thā

laKHt-e-jigar to apne yak-laKHt ro chuka tha

ashk-e-faqat ka jhamka aankhon se lag raha tha

daman mein aaj dekha phir laKHt main le aaya

TukDa koi jigar ka palkon mein rah gaya tha

us qaid-e-jeb se main chhoTa junun ki daulat

warna gala ye mera jun tauq mein phansa tha

musht-e-namak ki KHatir is waste hun hairan

kal zaKHm-e-dil nihayat dil ko mere laga tha

ai gard-baad mat de har aan arz-e-wahshat

main bhi kasu zamane is kaam mein bala tha

bin kuchh kahe suna hai aalam se main ne kya kya

par tu ne yun na jaana ai bewafa ki kya tha

roti hai shama itna har shab ki kuchh na puchho

main soz-e-dil ko apne majlis mein kyun kaha tha

shab zaKHm-e-sina upar chhiDka tha main namak ko

nasur to kahan tha zalim baDa maza tha

sar mar kar hua tha main KHak us gali mein

sine pe mujh ko us ka mazkur naqsh-e-pa tha

so baKHt-e-tira se hun pamali-e-saba mein

us din ke waste main kya KHak mein mila tha

ye sar-guzasht meri afsana jo hui hai

mazkur us ka us ke kuche mein ja-ba-ja tha

sun kar kisi se wo bhi kahne laga tha kuchh kuchh

be-dard kitne bole han us ko kya hua tha

kahne laga ki jaane meri bala azizan

ahwal tha kisi ka kuchh main bhi sun liya tha

aankhen meri khulin jab ji 'mir' ka gaya tab

dekhe se us ko warna mera bhi ji jala tha