larazte TuTte girte hue jahan se nikal

larazte TūTte girte hue jahāñ se nikal

ziyāda ḳhauf-zada hai to is makāñ se nikal

hamāre dil kā ta.alluq nahīñ zamāne se

sau apnī ḳhvāhish-e-duniyā uThā yahāñ se nikal

tire jamāl kī lau tere ba.ad rah jaa.e

diye jalātā huā is jahān-e-jāñ se nikal

maiñ rab ke nuur se mahv-e-kalām huuñ sar-e-shām

sū-e-charāġh-e-duā tū bhī darmiyāñ se nikal

ab is ke ba.ad qayāmat hai tū bhī ai 'shahzād'

duā.eñ paḌhtā huā shahr-e-be-amāñ se nikal

larazte TuTte girte hue jahan se nikal

ziyaada KHauf-zada hai to is makan se nikal

hamare dil ka talluq nahin zamane se

sau apni KHwahish-e-duniya uTha yahan se nikal

tere jamal ki lau tere baad rah jae

diye jalata hua is jahan-e-jaan se nikal

main rab ke nur se mahw-e-kalam hun sar-e-sham

su-e-charagh-e-dua tu bhi darmiyan se nikal

ab is ke baad qayamat hai tu bhi ai 'shahzad'

duaen paDhta hua shahr-e-be-aman se nikal