le liya allah se maine kabhi bhagwan se

le liyā allāh se maiñ ne kabhī bhagvān se

kaam kitne hī nikāle jaan aur pahchān se

dekhnā un khāne vāloñ ko na aa.egā maza

kal kī jaane vaalī murġhī aaj jaa.e jaan se

har kas-o-nā-kas kī sun kar an-sunī kartā huuñ maiñ

baat begam kī sunā kartā huuñ puure dhyān se

ham kisī netā ke dum-chhalle nahīñ ban kar rahe

zindagī ham ne guzārī hai bahut hī shaan se

maar kar chaturā.ī se charba kiyā aur paḌh diyā

sher kitne hī uḌā kar 'mīr' ke dīvān se

bas chale mātā-pitā hī zahr de kar maar deñ

sab pareshāñ-hāl haiñ baḌhtī huī santān se

chaa.e piite haiñ to fauran baḌh ke le lete haiñ paan

dab ke ham rahte nahīñ kam-zarf ke ehsān se

le liya allah se main ne kabhi bhagwan se

kaam kitne hi nikale jaan aur pahchan se

dekhna un khane walon ko na aaega maza

kal ki jaane wali murghi aaj jae jaan se

har kas-o-na-kas ki sun kar an-suni karta hun main

baat begam ki suna karta hun pure dhyan se

hum kisi neta ke dum-chhalle nahin ban kar rahe

zindagi hum ne guzari hai bahut hi shan se

mar kar chaturai se charba kiya aur paDh diya

sher kitne hi uDa kar 'mir' ke diwan se

bas chale mata-pita hi zahr de kar mar den

sab pareshan-haal hain baDhti hui santan se

chae pite hain to fauran baDh ke le lete hain pan

dab ke hum rahte nahin kam-zarf ke ehsan se