le qaza ehsan tujh par kar chale

le qazā ehsān tujh par kar chale

ham tire aane se pahle mar chale

kūcha-e-jānāñ meñ jaanā hai zarūr

chāhe aarā sar pe yā ḳhanjar chale

bas ye hai kū-e-butāñ kī sarguzisht

sar pe mere saikḌoñ patthar chale

kū-e-jānāñ kā na paayā kuchh nishān

ḳhizr ke ham-rāh ham din bhar chale

paa.ī tere dar pe aa kar zindagī

o masīhā khā ke ham Thokar chale

dekhiye dekheñge kyā roz-e-jazā

yaañ bashar aa.e vahāñ bā-shar chale

ho ḳhizāñ kyūñ-kar na gulshan kī bahār

jab yahāñ bād-e-sabā sar-sar chale

bazm se jaate ho duzdīda-nazar

nīm-bismil kar chale kyā kar chale

qaul-e-vā.iz ne na kuchh tāsīr kī

kushta-e-kākul pe kab mantar chale

ḳhuuñ tirī tirchhī nigāhoñ ne kiyā

laakh ḳhanjar ek kushte par chale

farsh par hai yuuñ ḳhirāmāñ rashk-e-māh

arsh par jaise koī aḳhtar chale

kab huī saudā-e-mizhgāñ se shifā

nashtaroñ par saikḌoñ nashtar chale

le qaza ehsan tujh par kar chale

hum tere aane se pahle mar chale

kucha-e-jaanan mein jaana hai zarur

chahe aara sar pe ya KHanjar chale

bas ye hai ku-e-butan ki sarguzisht

sar pe mere saikDon patthar chale

ku-e-jaanan ka na paya kuchh nishan

KHizr ke ham-rah hum din bhar chale

pai tere dar pe aa kar zindagi

o masiha kha ke hum Thokar chale

dekhiye dekhenge kya roz-e-jaza

yan bashar aae wahan ba-shar chale

ho KHizan kyun-kar na gulshan ki bahaar

jab yahan baad-e-saba sar-sar chale

bazm se jate ho duzdida-nazar

nim-bismil kar chale kya kar chale

qaul-e-waiz ne na kuchh tasir ki

kushta-e-kakul pe kab mantar chale

KHun teri tirchhi nigahon ne kiya

lakh KHanjar ek kushte par chale

farsh par hai yun KHiraman rashk-e-mah

arsh par jaise koi aKHtar chale

kab hui sauda-e-mizhgan se shifa

nashtaron par saikDon nashtar chale