libas-e-KHak sahi par kahin zarur hun main

libās-e-ḳhāk sahī par kahīñ zarūr huuñ maiñ

batā rahī hai chamak aañkh kī ki nuur huuñ maiñ

koī nahīñ jo mirī lau se rāsta dekhe

havā-e-tund bujhā de tire huzūr huuñ maiñ

panāh detā nahīñ koī aur sayyāra

bhaTak rahā huuñ ḳhalā meñ zamīñ se duur huuñ maiñ

na ho girā ke mujhe tū bhī ḳhaak meñ mil jaa.e

mujhe gale se lagā le tirā ġhurūr huuñ maiñ

nikal paḌā huuñ yūñhī itnī barf-bārī meñ

badan ke garm lahū kā ajab surūr huuñ maiñ

sazā bhī kaaT chukā huuñ maiñ jis ḳhatā kī 'nasīm'

kise pukārūñ kahūñ is meñ be-qusūr huuñ maiñ

libas-e-KHak sahi par kahin zarur hun main

bata rahi hai chamak aankh ki ki nur hun main

koi nahin jo meri lau se rasta dekhe

hawa-e-tund bujha de tere huzur hun main

panah deta nahin koi aur sayyara

bhaTak raha hun KHala mein zamin se dur hun main

na ho gira ke mujhe tu bhi KHak mein mil jae

mujhe gale se laga le tera ghurur hun main

nikal paDa hun yunhi itni barf-bari mein

badan ke garm lahu ka ajab surur hun main

saza bhi kaT chuka hun main jis KHata ki 'nasim'

kise pukarun kahun is mein be-qusur hun main