likha hai go teri qismat mein shaukat chashm-e-tar rakhna

likhā hai go terī qismat meñ 'shaukat' chashm-e-tar rakhnā

magar zālim kisī kī aabrū par bhī nazar rakhnā

na bhūlegā na bhūlegā qayāmat tak na bhūlegā

kisī kā vo mohabbat se mire siine pe sar rakhnā

na uTThegā dil-e-nāzuk se sadma ranj-e-furqat kā

ilāhī mere dard-e-dil se un ko be-ḳhabar rakhnā

vo kyā jaane bhalā hotī haiñ kaisī 'aish kī rāteñ

mayassar ho na jis ko tā-sahar takiye pe sar rakhnā

dil-e-be-ārzū kaafī hai ham hasrat-nasīboñ ko

mubārak ho sadaf ko apnī muTThī meñ guhar rakhnā

na ho kis tarah shart-e-dilbarī duniyā meñ dildārī

jahāñ meñ ghar banānā sahl hai mushkil hai ghar rakhnā

likha hai go teri qismat mein 'shaukat' chashm-e-tar rakhna

magar zalim kisi ki aabru par bhi nazar rakhna

na bhulega na bhulega qayamat tak na bhulega

kisi ka wo mohabbat se mere sine pe sar rakhna

na uTThega dil-e-nazuk se sadma ranj-e-furqat ka

ilahi mere dard-e-dil se un ko be-KHabar rakhna

wo kya jaane bhala hoti hain kaisi 'aish ki raaten

mayassar ho na jis ko ta-sahar takiye pe sar rakhna

dil-e-be-arzu kafi hai hum hasrat-nasibon ko

mubarak ho sadaf ko apni muTThi mein guhar rakhna

na ho kis tarah shart-e-dilbari duniya mein dildari

jahan mein ghar banana sahl hai mushkil hai ghar rakhna