lillah koi koshish na kare ulfat mein mujhe samjhane ki

lillāh koī koshish na kare ulfat meñ mujhe samjhāne kī

jalne ke alāva aur koī manzil hī nahīñ parvāne kī

Darne ko to kitne Darte haiñ rusvā.ī se vo dīvāne kī

ik had to muqarrar kar dete zulfoñ ke liye lahrāne kī

nazreñ to milātī thiiñ un se kuchh baat na thī ghabrāne kī

ai ishq magar ham chuuk ga.e ye choT thī dil par khāne kī

qurbat ho ki duurī donoñ meñ ik kaif-e-mohabbat hotā hai

ye bhī hai isī mai-ḳhāne kī vo bhī hai isī mai-ḳhāne kī

sayyād ne khul kar baat na kī jis din se qafas meñ aayā huuñ

mālūm nahīñ miTTī merī gulshan kī hai yā vīrāne kī

saaqī tire lutf-e-ām se ham vāqif haiñ magar ye yaad rahe

is daur meñ kam raas aatī hai shīshe ko duā paimāne kī

is tarah milā kar pī jaanā har rind ke bas kī baat nahīñ

thoḌī sī kisī paimāne kī thoḌī sī kisī paimāne kī

lillah koi koshish na kare ulfat mein mujhe samjhane ki

jalne ke alawa aur koi manzil hi nahin parwane ki

Darne ko to kitne Darte hain ruswai se wo diwane ki

ek had to muqarrar kar dete zulfon ke liye lahrane ki

nazren to milati thin un se kuchh baat na thi ghabrane ki

ai ishq magar hum chuk gae ye choT thi dil par khane ki

qurbat ho ki duri donon mein ek kaif-e-mohabbat hota hai

ye bhi hai isi mai-KHane ki wo bhi hai isi mai-KHane ki

sayyaad ne khul kar baat na ki jis din se qafas mein aaya hun

malum nahin miTTi meri gulshan ki hai ya virane ki

saqi tere lutf-e-am se hum waqif hain magar ye yaad rahe

is daur mein kam ras aati hai shishe ko dua paimane ki

is tarah mila kar pi jaana har rind ke bas ki baat nahin

thoDi si kisi paimane ki thoDi si kisi paimane ki