lipaT rahi hain jo tujhse duaen meri hain

lipaT rahī haiñ jo tujh se duā.eñ merī haiñ

havā kā shor nahīñ hai sadā.eñ merī haiñ

kisī bhī raah se tum aa sako to aa jaanā

ki shahr merā hai saarī dishā.eñ merī haiñ

uḌā rahe ho yahāñ jin kī dhajjiyāñ tum bhī

ye jaan lo ki vo saarī ridā.eñ merī haiñ

mujhe to gaañv kī miTTī hai jaan se bhī aziiz

vahāñ kī galiyoñ meñ kyā kyā adā.eñ merī haiñ

tumheñ to chāñdnī ban kar fazā meñ ghulnā hai

shab-e-siyāh kī saarī balā.eñ merī haiñ

pahan ke jis ko haiñ aġhyār surḳh-rū 'anjum'

vo sādgī se muzayyan qabā.eñ merī haiñ

lipaT rahi hain jo tujh se duaen meri hain

hawa ka shor nahin hai sadaen meri hain

kisi bhi rah se tum aa sako to aa jaana

ki shahr mera hai sari dishaen meri hain

uDa rahe ho yahan jin ki dhajjiyan tum bhi

ye jaan lo ki wo sari ridaen meri hain

mujhe to ganw ki miTTi hai jaan se bhi aziz

wahan ki galiyon mein kya kya adaen meri hain

tumhein to chandni ban kar faza mein ghulna hai

shab-e-siyah ki sari balaen meri hain

pahan ke jis ko hain aghyar surKH-ru 'anjum'

wo sadgi se muzayyan qabaen meri hain