liye hue dil-e-pur-nam udas rahta hai

liye hue dil-e-pur-nam udaas rahtā hai

tumhāre baa'd ye 'ālam udaas rahtā hai

hañsī utaar ke dekhā to ham ne ye paayā

nazar jo aatā hai ḳhurram udaas rahtā hai

ka.ī dinoñ se tirī yaad bhī nahīñ aa.ī

ka.ī dinoñ se mirā ġham udaas rahtā hai

koī batā.e use us ke ruuTh jaane se

hamāre shahr kā mausam udaas rahtā hai

mire ḳhudā maraz-e-'ishq to nahīñ us ko

vo ek laḌkā jo har dam udaas rahtā hai

tumheñ ga.e to zamāne hue magar ab tak

ilāhabād kā sangam udaas rahtā hai

use batāo ki tauhīn-e-hijr hai ye bhī

vo hijr meñ bhī bahut kam udaas rahtā hai

kabhī kabhī hī sahī muskurā to lete haiñ ham

magar vo shaḳhs to har dam udaas rahtā hai

chalā gayā thā tumheñ chhoḌ ke jo pichhle baras

'asad' tumhārā vo hamdam udaas rahtā hai

liye hue dil-e-pur-nam udas rahta hai

tumhaare ba'd ye 'alam udas rahta hai

hansi utar ke dekha to hum ne ye paya

nazar jo aata hai KHurram udas rahta hai

kai dinon se teri yaad bhi nahin aai

kai dinon se mera gham udas rahta hai

koi batae use us ke ruTh jaane se

hamare shahr ka mausam udas rahta hai

mere KHuda maraz-e-'ishq to nahin us ko

wo ek laDka jo har dam udas rahta hai

tumhein gae to zamane hue magar ab tak

ilahabaad ka sangam udas rahta hai

use batao ki tauhin-e-hijr hai ye bhi

wo hijr mein bhi bahut kam udas rahta hai

kabhi kabhi hi sahi muskura to lete hain hum

magar wo shaKHs to har dam udas rahta hai

chala gaya tha tumhein chhoD ke jo pichhle baras

'asad' tumhaara wo hamdam udas rahta hai