lo aaj samundar ke kinare pe khaDa hun

lo aaj samundar ke kināre pe khaḌā huuñ

ġharqāb safīnoñ ke sisakne kī sadā huuñ

ik ḳhāk-ba-sar barg huuñ Tahnī se judā huuñ

joḌegā mujhe kaun ki maiñ TuuT gayā huuñ

ab bhī mujhe apnā.e na duniyā to karūñ kyā

māhaul se paimān-e-vafā bāñdh rahā huuñ

mustaqbil-e-but-ḳhāna kā hāfiz hai ḳhudā hī

har but ko ye da.avā hai ki ab maiñ hī ḳhudā huuñ

afkār-e-do-ālam na jhiñjhoḌeñ mujhe is vaqt

apne hī ḳhayālāt kī daldal meñ phañsā huuñ

manzil kā to irfān nahīñ itnī ḳhabar hai

jis samt se aayā thā usī samt chalā huuñ

muddat huī guzrā thā idhar se mirā saaya

kab se yūñhī fōtpath pe ḳhāmosh paḌā huuñ

huuñ aap kā bas mujh ko hai itnā hī ġhanīmat

is se koī matlab nahīñ achchhā ki burā huuñ

pahnāo mire paañv meñ zanjīr-e-bū-e-gul

āvāra chaman meñ sifat-e-bād-e-sabā huuñ

chheḌo na mujhe jān-e-'ziyā' fasl-e-junūñ meñ

kyā maiñ bhī koī naġhma-e-andoh-rubā huuñ

lo aaj samundar ke kinare pe khaDa hun

gharqab safinon ke sisakne ki sada hun

ek KHak-ba-sar barg hun Tahni se juda hun

joDega mujhe kaun ki main TuT gaya hun

ab bhi mujhe apnae na duniya to karun kya

mahaul se paiman-e-wafa bandh raha hun

mustaqbil-e-but-KHana ka hafiz hai KHuda hi

har but ko ye dawa hai ki ab main hi KHuda hun

afkar-e-do-alam na jhinjhoDen mujhe is waqt

apne hi KHayalat ki daldal mein phansa hun

manzil ka to irfan nahin itni KHabar hai

jis samt se aaya tha usi samt chala hun

muddat hui guzra tha idhar se mera saya

kab se yunhi footpath pe KHamosh paDa hun

hun aap ka bas mujh ko hai itna hi ghanimat

is se koi matlab nahin achchha ki bura hun

pahnao mere panw mein zanjir-e-bu-e-gul

aawara chaman mein sifat-e-baad-e-saba hun

chheDo na mujhe jaan-e-'ziya' fasl-e-junun mein

kya main bhi koi naghma-e-andoh-ruba hun