log giton ka nagar yaad aaya

log gītoñ kā nagar yaad aayā

aaj pardes meñ ghar yaad aayā

jab chale aa.e chaman-zār se ham

iltifāt-e-gul-e-tar yaad aayā

terī begāna-nigāhī sar-e-shām

ye sitam tā-ba-sahar yaad aayā

ham zamāne kā sitam bhuul ga.e

jab tirā lutf-e-nazar yaad aayā

to bhī masrūr thā is shab sar-e-bazm

apne sheroñ kā asar yaad aayā

phir huā dard-e-tamannā bedār

phir dil-e-ḳhāk-basar yaad aayā

ham jise bhuul chuke the 'jālib'

phir vahī rāhguzar yaad aayā

log giton ka nagar yaad aaya

aaj pardes mein ghar yaad aaya

jab chale aae chaman-zar se hum

iltifat-e-gul-e-tar yaad aaya

teri begana-nigahi sar-e-sham

ye sitam ta-ba-sahar yaad aaya

hum zamane ka sitam bhul gae

jab tera lutf-e-nazar yaad aaya

to bhi masrur tha is shab sar-e-bazm

apne sheron ka asar yaad aaya

phir hua dard-e-tamanna bedar

phir dil-e-KHak-basar yaad aaya

hum jise bhul chuke the 'jalib'

phir wahi rahguzar yaad aaya