lutf-e-wafa nahin ki wo bedad-gar nahin

lutf-e-vafā nahīñ ki vo bedād-gar nahīñ

ḳhāmosh huuñ ki merī fuġhāñ be-asar nahīñ

tere baġhair talḳhi-e-kām-o-dahan harām

dard-e-jigar hai lazzat-e-dard-e-jigar nahīñ

sajdoñ se nā-murād hai jalvoñ se nā-umīd

vo rahguzar ki ab jo tirī rahguzar nahīñ

tum kyā ga.e ki saarā zamāna chalā gayā

vo rāt-din nahīñ haiñ vo shām-o-sahar nahīñ

har har ravish muāmla-e-husn-o-āshiqī

har har qadam faroġh-e-jamāl-e-nazar nahīñ

bebāk chaal chaal se bebāk-tar nazar

ab husn to bahut hai magar fitna-gar nahīñ

zaḳhmoñ se chuur qāfile pur-ḳhār rāste

is meñ tirā qusūr to ai rāhbar nahīñ

duniyā-e-chashm-o-gosh to barbād ho ga.ī

ab kuchh baġhair ma.arka-e-ḳhair-o-shar nahīñ

lutf-e-wafa nahin ki wo bedad-gar nahin

KHamosh hun ki meri fughan be-asar nahin

tere baghair talKHi-e-kaam-o-dahan haram

dard-e-jigar hai lazzat-e-dard-e-jigar nahin

sajdon se na-murad hai jalwon se na-umid

wo rahguzar ki ab jo teri rahguzar nahin

tum kya gae ki sara zamana chala gaya

wo raat-din nahin hain wo sham-o-sahar nahin

har har rawish muamla-e-husn-o-ashiqi

har har qadam farogh-e-jamal-e-nazar nahin

bebak chaal chaal se bebak-tar nazar

ab husn to bahut hai magar fitna-gar nahin

zaKHmon se chur qafile pur-KHar raste

is mein tera qusur to ai rahbar nahin

duniya-e-chashm-o-gosh to barbaad ho gai

ab kuchh baghair marka-e-KHair-o-shar nahin