lutf-saman itab-e-yar bhi hai

lutf-sāmāñ itāb-e-yār bhī hai

mahram-e-ishq sharmsār bhī hai

sust-paimān o be-niyāz sahī

husn tasvīr-e-intizār bhī hai

kyā kare vo nigāh-e-lutf ki ishq

shādmāñ bhī hai sogvār bhī hai

gulshan-e-ishq huuñ ḳhizāñ merī

vaj.h-e-rañgīnī-e-bahār bhī hai

uqda-e-ishq ko na tū samjhā

yahī uqda kushūd-e-kār bhī hai

apnī taqdīr apne haath meñ le

shāmil-e-jabr iḳhtiyār bhī hai

aap apnā chaḌhāv apnā utaar

zindagī nashsha hai ḳhumār bhī hai

un nigāhoñ meñ hai shikāyat sī

ishq shāyad jafā-shi.ār bhī hai

dil se hai duur bhī nigāh tirī

dil ke andar hai dil ke paar bhī hai

sar-ba-sar ġharq-e-nūr ho lekin

zindagī iktisāb-e-nār bhī hai

kaun tarġhīb-e-hosh de ki junūñ

be-ḳhabar bhī hai hoshiyār bhī hai

ḳhalvat-e-husn-o-ishq bhī hai udaas

sard kuchh bazm-e-rozgār bhī hai

raaz us aañkh kā nahīñ khultā

dil shakebā bhī be-qarār bhī hai

ḳhud tujhe bhī huī na jin kī ḳhabar

un jafāoñ kā kuchh shumār bhī hai

is meñ lākhoñ nizām-e-shamsī haiñ

yuuñ to dil tīra-rozgār bhī hai

is kī zau us kī garmiyāñ mat pūchh

zindagī nuur bhī hai naar bhī hai

ishq-e-hijrāñ-nasīb kā bhī hai dhyān

tire va.ade kā e'tibār bhī hai

ishq hī se haiñ manzileñ ābād

kārvāñ kārvāñ pukār bhī hai

koī samjhā use na dekh sakā

nigah-e-shoḳh sharmsār bhī hai

us se chhuT kar ye sochtā huuñ 'firāq'

is meñ kuchh apnā iḳhtiyār bhī hai

lutf-saman itab-e-yar bhi hai

mahram-e-ishq sharmsar bhi hai

sust-paiman o be-niyaz sahi

husn taswir-e-intizar bhi hai

kya kare wo nigah-e-lutf ki ishq

shadman bhi hai sogwar bhi hai

gulshan-e-ishq hun KHizan meri

wajh-e-rangini-e-bahaar bhi hai

uqda-e-ishq ko na tu samjha

yahi uqda kushud-e-kar bhi hai

apni taqdir apne hath mein le

shamil-e-jabr iKHtiyar bhi hai

aap apna chaDhaw apna utar

zindagi nashsha hai KHumar bhi hai

un nigahon mein hai shikayat si

ishq shayad jafa-shiar bhi hai

dil se hai dur bhi nigah teri

dil ke andar hai dil ke par bhi hai

sar-ba-sar gharq-e-nur ho lekin

zindagi iktisab-e-nar bhi hai

kaun targhib-e-hosh de ki junun

be-KHabar bhi hai hoshiyar bhi hai

KHalwat-e-husn-o-ishq bhi hai udas

sard kuchh bazm-e-rozgar bhi hai

raaz us aankh ka nahin khulta

dil shakeba bhi be-qarar bhi hai

KHud tujhe bhi hui na jin ki KHabar

un jafaon ka kuchh shumar bhi hai

is mein lakhon nizam-e-shamsi hain

yun to dil tira-rozgar bhi hai

is ki zau us ki garmiyan mat puchh

zindagi nur bhi hai nar bhi hai

ishq-e-hijran-nasib ka bhi hai dhyan

tere wade ka e'tibar bhi hai

ishq hi se hain manzilen aabaad

karwan karwan pukar bhi hai

koi samjha use na dekh saka

nigah-e-shoKH sharmsar bhi hai

us se chhuT kar ye sochta hun 'firaq'

is mein kuchh apna iKHtiyar bhi hai