maal-e-ehtisab ye ki hum baDe KHarab hain

ma.āl-e-ehtisāb ye ki ham baḌe ḳharāb haiñ

kisī pe tanz kyā kareñ ki ḳhud hī aab aab haiñ

basīratoñ ke irtiqā kī intihā hai āgahī

mirī nazar se dekhiye to ḳhvāhisheñ sarāb haiñ

kisī kā dard dekh kar taḌap ga.e to ro diye

shi.ār-e-dard-mañd ko basārteñ azaab haiñ

ba-e'tibār-e-ilm jin kī haisiyat faqīr sī

ba-e'tibār māl-o-zar vo sāhab-e-nisāb haiñ

ḳhirad tamām mas.aloñ kā hal junūñ se pūchhtī

javāb ek chāhiye savāl be-hisāb haiñ

hamāre baad kasmapursī-e-ġhazal kā daur hai

hameñ to ḳhair chand qār.īn dastiyāb haiñ

maal-e-ehtisab ye ki hum baDe KHarab hain

kisi pe tanz kya karen ki KHud hi aab aab hain

basiraton ke irtiqa ki intiha hai aagahi

meri nazar se dekhiye to KHwahishen sarab hain

kisi ka dard dekh kar taDap gae to ro diye

shiar-e-dard-mand ko basarten azab hain

ba-e'tibar-e-ilm jin ki haisiyat faqir si

ba-e'tibar mal-o-zar wo sahab-e-nisab hain

KHirad tamam masalon ka hal junun se puchhti

jawab ek chahiye sawal be-hisab hain

hamare baad kasmapursi-e-ghazal ka daur hai

hamein to KHair chand qarin dastiyab hain