maal-e-rang-e-chaman chashm-e-ashk-bar mein hai

ma.āl-e-rang-e-chaman chashm-e-ashk-bār meñ hai

jo gul hai dāġh-e-ḳhizāñ sīna-e-bahār meñ hai

faroġh-e-dīda-e-yāqūb hai kise ma.alūm

vo kārvāñ jo abhī parda-e-ġhubār meñ hai

bachā sakeñge na ye naġhma-hā-e-chang-o-rabāb

sipar uThā ki tū maidān-e-kār-zār meñ hai

bilittifāq hai manzil-gah-e-mah-o-ḳhurshīd

tirā vo naqsh-e-kaf-e-pā jo rahguzār meñ hai

ajiib shai hai barā.e muraqqa'a-e-hastī

vo rang-e-jabr jo tasvīr-e-iḳhtiyār meñ hai

varā-e-mansab-e-ma.asūmiyat hai merā gunāh

ki us kā haath bhī taḳhlīq-e-rozgār meñ hai

jise koī ba-juz ahl-e-nazar samajh na sakā

vo maslahat bhī junūn-e-ḳhirad-shikār meñ hai

shahīd-e-ḳhanjar-e-abrū kabhī nahīñ marte

tū aañkh uThā ki abhī 'faiz' intizār meñ hai

maal-e-rang-e-chaman chashm-e-ashk-bar mein hai

jo gul hai dagh-e-KHizan sina-e-bahaar mein hai

farogh-e-dida-e-yaqub hai kise malum

wo karwan jo abhi parda-e-ghubar mein hai

bacha sakenge na ye naghma-ha-e-chang-o-rabab

sipar uTha ki tu maidan-e-kar-zar mein hai

bilittifaq hai manzil-gah-e-mah-o-KHurshid

tera wo naqsh-e-kaf-e-pa jo rahguzar mein hai

ajib shai hai barae muraqqa'a-e-hasti

wo rang-e-jabr jo taswir-e-iKHtiyar mein hai

wara-e-mansab-e-masumiyat hai mera gunah

ki us ka hath bhi taKHliq-e-rozgar mein hai

jise koi ba-juz ahl-e-nazar samajh na saka

wo maslahat bhi junun-e-KHirad-shikar mein hai

shahid-e-KHanjar-e-abru kabhi nahin marte

tu aankh uTha ki abhi 'faiz' intizar mein hai