mail-zabt bhi aamada-e-fariyaad bhi hai

mā.il-zabt bhī āmāda-e-fariyād bhī hai

dil giraftār-e-mohabbat bhī hai āzād bhī hai

dāstān-e-dil-e-māsūm na pūchh ai hamdam

ye vo bastī hai jo ābād bhī barbād bhī hai

ai mire zabt ko kāmil na samajhne vaale

qābil-e-dād mirī koshish-e-fariyād bhī hai

uḌ ke jā.ūñ bhī to kyā aur na jā.ūñ bhī to kyā

muntazir barq bhī hai taak meñ sayyād bhī hai

kyā likhūñ kyā na likhūñ surḳhī-e-afsāna-e-dil

ġham bhī hai dard bhī hasrat bhī hai fariyād bhī hai

dil-e-dīvāna kī to hastī-e-hushiyār na pūchh

ye giraftār-e-qafas tā.ir-e-āzād bhī hai

merī taskīn to kar bhuul ke itnā to batā

yaad rakhne kā jo va.ada thā tujhe yaad bhī hai

ik 'ravish' dil kī ho ai 'arsh' to kuchh baat bhī ho

kyā musībat hai ki ye shaad bhī nāshād bhī hai

mail-zabt bhi aamada-e-fariyaad bhi hai

dil giraftar-e-mohabbat bhi hai aazad bhi hai

dastan-e-dil-e-masum na puchh ai hamdam

ye wo basti hai jo aabaad bhi barbaad bhi hai

ai mere zabt ko kaamil na samajhne wale

qabil-e-dad meri koshish-e-fariyaad bhi hai

uD ke jaun bhi to kya aur na jaun bhi to kya

muntazir barq bhi hai tak mein sayyaad bhi hai

kya likhun kya na likhun surKHi-e-afsana-e-dil

gham bhi hai dard bhi hasrat bhi hai fariyaad bhi hai

dil-e-diwana ki to hasti-e-hushiyar na puchh

ye giraftar-e-qafas tair-e-azad bhi hai

meri taskin to kar bhul ke itna to bata

yaad rakhne ka jo wada tha tujhe yaad bhi hai

ek 'rawish' dil ki ho ai 'arsh' to kuchh baat bhi ho

kya musibat hai ki ye shad bhi nashad bhi hai