mal-o-mata-e-dasth sarabon ko de diya

māl-o-matā-e-dasth sarāboñ ko de diyā

jo kuchh zar-e-ḳhayāl thā ḳhvāboñ ko de diyā

rakhne kā jo guhar thā use dil meñ rakh liyā

bikne kā thā jo maal kitāboñ ko de diyā

sabzoñ ko ḳhush-libās banā kar zamīn ne

kuchh rashk kā javāz gulāboñ ko de diyā

apne lahū kī buuñd banā kar dam-e-nashāt

ik soz-e-lā-zavāl sharāboñ ko de diyā

aa.e na jab giraft meñ saif-o-qalam 'na.īm'

apnā tamām karb rabāboñ ko de diyā

mal-o-mata-e-dasth sarabon ko de diya

jo kuchh zar-e-KHayal tha KHwabon ko de diya

rakhne ka jo guhar tha use dil mein rakh liya

bikne ka tha jo mal kitabon ko de diya

sabzon ko KHush-libas bana kar zamin ne

kuchh rashk ka jawaz gulabon ko de diya

apne lahu ki bund bana kar dam-e-nashat

ek soz-e-la-zawal sharabon ko de diya

aae na jab giraft mein saif-o-qalam 'naim'

apna tamam karb rababon ko de diya